энергетика
КАЙ БА ИСТИҚЛОЛИЯТИ ЭНЕРГЕТИКӢ МЕРАСЕМ?
Ин суоле буд, ки дар рафти нишасти матбуотӣ чанд бор ба вазири энергетика ва захираҳои оби ҷумҳурӣ Усмоналӣ Усмонзода дода шуд. Посух ҳарчанд аниқ набуд, аммо ҳозиронро умедвор менамуд, ки аҷаб нест дар зимистони соли 2017 ба он муваффақ гардем. Он ҳам ба шарте ки иқтидорҳои нав дар неругоҳҳои амалкунанда ба кор андохта шуда, Маркази барқу гармидиҳии “Душанбе - 2” пурра фаъол шавад.
Вазир дар нишаст иброз намуд, ки яке аз дастовардҳои муҳими соҳа дар соли гузашта ба кор андохтани иқтидорҳои энергетикӣ ба андозаи 210 МВт, аз ҷумла агрегати дуюми НБО “Сангтӯда - 2” бо иқтидори 110 МВт ва навбати аввали МБГ - 2 - и шаҳри Душанбе бо иқтидори 100 МВт мебошад, ки таъмини аҳолиро бо неруи барқ дар фасли зимистон нисбатан беҳтар намуд.
Ба таври мусбат анҷом пазируфтани асосноккунии техникӣ - иқтисодӣ, иҷтимоӣ ва экологии сохтмони НБО “Роғун”, ба имзо расидани Протоколи дахлдори Шӯрои байниҳукуматии Лоиҳаи минтақавии интиқоли барқи “САSА - 1000”, ифтитоҳи расмии ду лоиҳаи нави бузург дар соҳаи энергетика – сохтмони лӯлаи гази “Туркманистон - Хитой” ва навбати дуюми МБГ – 2 - и шаҳри Душанбе бо иқтидори 300 МВт, инчунин оғоз гардидани корҳои сохтмонӣ дар хати интиқоли барқи 220 кВт “Қайроққум - Ашт”, “Геран - Румӣ” ва сохтмону бароҳандозии дигар иншооти хурду бузурги энергетикӣ аз рӯйдодҳои хотирмони соли сипаригардида мебошанд.
Дар соли ҳисоботӣ дар ҷумҳурӣ 16,4 миллиард кВт. соат неруи барқ истеҳсол гардида, содироти он 1 миллиарду 321 миллион кВт. соатро ташкил додааст, ки ин нисбат ба соли 2013 356,5 миллион кВт. соат зиёд буда, суръати афзоиш 137,1 фоиз аст.
Дар соли 2014 дар корхонаю ҷамъиятҳои истеҳсолкунандаи нафту газ 24 ҳазору 508 тонна нафт ва 3 миллиону 217 ҳазор метри мукааб гази табиӣ истихроҷ карда шудааст. Вазорат ҷиҳати омӯзиш ва кашфи захираҳои нави нафту газ, инчунин афзудани истеҳсоли онҳо ҳамкориро бо ширкатҳои бонуфузи ҷаҳон, аз қабили “Газпром”, “Тетис - петролиум”, “Тотал”, “СНПС” ва ғайра идома медиҳад.
-Дар давраи ҳисоботӣ ташкилоту идораҳои марбут ба таъмини об аз сарчашмаҳои гуногуни обгирӣ ба мақсади обёрии заминҳо, 8,9 миллиард метри мукааб барои ошомидан ва дигар мақсадҳо 265,5 миллион метри мукааб, дар маҷмӯъ 9,3 миллиард метри мукааб об додаанд, - гуфт дар хотима Усмоналӣ Усмонзода.
Мирзои ФИРӮЗ
Баёни ақида (0) Санаи нашр: 23.01.15 №: 16 Мутолиа карданд: 14800
