порлумон
ҲАМЛУ НАҚЛИ БАЙНАЛМИЛАЛӢ ОСОН МЕШАВАД
Дар ҷаласаи Маҷлиси намояндагони Маҷлиси Олӣ Ганҷалзода Шералӣ, муовини якуми вазири нақлиёт, зимни ба тасвиб расидани Созишнома байни ҳукуматҳои давлатҳои аъзои Созмони ҳамкории Шанхай оид ба фароҳам овардани шароити мусоид барои ҳамлу нақли байналмилалии автомобилӣ иброз дошт, ки он аз 27 модда ва се замима иборат буда, мақсадаш таъмини боэътимоду самарабахши ҳамлу нақли автомобилӣ дар самти рушди равобити савдои хориҷии давлатҳои аъзо ва такмил додани шароити ҳамлу нақли байналмилалии автомобилии бору мусофирон мебошад.
Тибқи он тарафҳо дар раванди амалигардонии ҳамлу нақли автомобилии байналмилалӣ содагардонии масъалаҳои вобаста ба убури сарҳадҳо, дастрас намудани раводид, гумрук, назорати нақлиёти фитосанитарӣ ва ветеринариро дар нақша дорад. Ҳамзамон тарафҳо метавонанд дар ҳамбастагӣ барои рушди инфрасохтори долонҳои нақлиёти автомобилӣ, ки ҳудудҳои давлатҳои аъзоро мепайванданд иштирок ва саҳмгузорӣ намоянд. Назар ба гуфтаи мавсуф, дар асоси моддаи 8 интиқолдиҳандагони давлатҳои тарафҳо ҳангоми амалӣ намудани ҳамлу нақли байналмилалии автомобилӣ дар доираи созишномаи мазкур дар асоси мутақобила аз пардохти боҷ ва дигар пардохтҳо вобаста ба соҳиб будан ва ё истифодабарии воситаҳои нақлиёт, инчунин истифодабарӣ ва нигоҳдории роҳҳои автомобилии давлати тарафи дигар озод карда мешаванд.
Абдузафар Иномов, вакили порлумон, зимни ба тасвиб расидани лоиҳаи Қонуни Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» гуфт, ки он ба мақсади амалӣ намудани қисми 1 – уми моддаи 10 - уми Қонуни Ҷумҳурии Тоҷикистон «Дар бораи силоҳ», ки мутобиқи он дар қаламрави Ҷумҳурии Тоҷикистон истеҳсол, сохтан, хариду фурӯш, коллексиякунӣ ё ба намоишгузории силоҳ ва лавозимоти ҷангии он бояд бо гирифтани иҷозатнома бо тартиби муқаррарнамудаи қонунгузории Ҷумҳурии Тоҷикистон ба роҳ монда шавад, таҳия ва пешниҳод гардидааст. Зеро Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» намудҳои фаъолиятеро, ки иҷозатномадиҳиро талаб намуда, асосҳои ҳуқуқии додани иҷозатномаро барои ҳуқуқи машғулшавӣ ба намудҳои мушаххаси фаъолият муқаррар кардааст.
Мунаввари САФАР,
«Ҷумҳурият»
Баёни ақида (0) Санаи нашр: 27.01.15 №: 18 Мутолиа карданд: 5432
