маориф
ТАВАҶҶУҲ БА ҶАВОНОН БЕШТАР АСТ
Сарвари давлат Эмомалӣ Раҳмон пайваста ба таълиму тарбияи насли наврас диққати ҷиддӣ зоҳир намуда, ояндаи давлату миллатро дар дасти ҷавонони боақлу хирад, соҳибмаълумоту соҳибмаърифат, худогоҳу хештаншинос, ватанпарвару меҳнатдӯст, ободкору созанда мебинад. Бо дастуру супоришҳои Сарвари давлат вазорату идораҳои дахлдор дар ин самт аз тадбирҳои муассир кор мегиранд. Масъалаҳои бо квотаи президентӣ таъмин намудани ҷавондухтарон аз деҳаҳои дурдасти кӯҳистон баҳри таҳсил дар макотиби олӣ, компютеркунонии муассисаҳои таҳсилоти миёнаи умумӣ, идрорпулӣ ба донишҷӯёни болаёқат, дастгирии ҷавонони боистеъдод исботи гуфтаҳоанд. Ҳукумати Ҷумҳурии Тоҷикистон ҳамаи шароиту имконотро барои мо муҳайё намудааст. Танҳо мебояд омӯхту донишҳои худро васеъ кард. Паёми имсолаи Президенти кишвар ба Маҷлиси Олӣ гувоҳи ин гуфтаҳост.
- Дар рушди ҳаёти иҷтимоӣ нақши занон ва ҷавонон ҳамчун неруи пешбарандаи ҷомеа ниҳоят арзишманд мебошад. Ташаббусҳои онҳо аз ҷониби Ҳукумати кишвар ҳамеша дастгирӣ ёфта, занону ҷавонон ба корҳои роҳбарӣ дар ҳамаи шохаҳои ҳокимият ва сохтору мақомоти давлатӣ ҷалб мешаванд. Онҳо ҳамчун давомдиҳандагони татбиқи ҳадафҳои олии мо имрӯзҳо бо азму иродаи қавӣ ба хотири пешрафти ояндаи давлати маҳбубамон саъю талош карда, дар бисёр соҳаҳо ба дастовардҳои назаррас ноил гардида истодаанд, гуфт Эмомалӣ Раҳмон, Президенти кишвар, дар Паёми солонаи хеш ба Маҷлиси Олӣ.
Тарбия ва дастгирии донишҷӯён низ дар мадди назари ҳамешагии Сарвари давлат қарор дорад. Тавре дар Паём таъкид шуд «имрӯзҳо беш аз 12 ҳазор нафар ҷавонони соҳибистеъдоду лаёқатманди мо дар хориҷи кишвар аз ҳисоби давлат таҳсил карда истодаанд. Ҳоло дар дохили кишвар зиёда аз 200 ҳазор нафар донишҷӯён таҳсил доранд». Зеро аз таълиму тарбияи онҳо тақдири оилаҳои минбаъд барпошаванда ва ҷомеаи солиму бомаърифат вобаста аст.
Фирӯза ҲУВАЙДУЛЛОЕВА,
омӯзгори коллеҷи тиббии ноҳияи Бобоҷон Ғафуров
Баёни ақида (0) Санаи нашр: 29.01.15 №: 20 Мутолиа карданд: 5554
