мулоқотҳо
ТАҲКИМИ ҲАМКОРИҲОИ НИЗОМӢ
Тоҷикистону Русия ба манзури тавсеаи ҳамкориҳои ҳарбӣ ва ҳарбӣ - техникӣ, таҳкими марз бо Афғонистон ва мубориза бо терроризму ифротгароӣ иқдомоти тозаеро рӯи даст мегиранд.
Мавзӯи густариши ҳамкории низомӣ байни ду давлат, рӯзи 28 январ дар мулоқоти Эмомалӣ Раҳмон, Президенти Ҷумҳурии Тоҷикистон, бо Анатолий Антонов, муовини вазири мудофиаи Федератсияи Русия, баррасӣ шуд. Тибқи иттилои Хадамоти матбуоти Президенти ҷумҳурӣ зимни суҳбат «таваҷҷуҳи асосӣ ба роҳҳои татбиқи амалии созишномаю тавофуқоти дуҷонибаи Тоҷикистону Русия дар ин самт ва ҳам қарорҳои дар доираи Созмони аҳдномаи амнияти дастаҷамъӣ ва Иттиҳоди Давлатҳои Мустақил қабулшуда зоҳир гардид». Сарвари давлат таъкид намудааст, ки тавофуқоти дар сатҳи олии сиёсӣ ва миёни сохторҳои дахлдори ду кишвар ҳосилшуда, бояд пурра ва сари вақт иҷро шаванд, зеро ба амнияту суботи муътамад дар минтақаи мо Русия ва дигар кишварҳои пасошӯравӣ ҳам манфиатдоранд.
Анатолий Антонов баъд аз мулоқот бо Эмомалӣ Раҳмон натиҷаи суҳбаташ бо Сарвари давлатро фарогир ва судманду пурарзиш унвон кард. Ӯ аз таваҷҷуҳи хосаи Эмомалӣ Раҳмон ба раванди ҳамкориҳои низомӣ қадрдонӣ карда, итминон дод, ки робитаҳо дар ин самт сатҳу сифати нав касб хоҳанд кард.
Муовини вазири мудофиаи Федератсияи Русия изҳор дошт, ки вазъи феълии минтақа ва ҷаҳон, авзои кунуниву дурнамои Афғонистон ва муқобилаи муштарак бо ҳар гуна хатарҳои эҳтимолӣ, бахусус дар пасманзари хуруҷи неруҳои НАТО аз Афғонистон мавзӯи меҳварии суҳбати мо буд.
- Вақт моро интизор намешавад, бояд фаврӣ амал кард. Яке аз ҳадафҳои сафари ҳайати Вазорати мудофиаи Федератсияи Русия мусоидат ба ҳарчи зудтар дастрас намудани ёриҳои низомие, ки дар доираи Созмони аҳдномаи амнияти дастаҷамъӣ ҳосил шудаанд, мебошад. Мо ба ин назарем, ки ироаи кумакҳои техникию низомӣ ба неруҳои низомии Тоҷикистон на танҳо амнияти ин кишвар, балки тамоми давлатҳои узви СААД – ро таъмин хоҳад кард, - гуфт Анатолий Антонов.
Дар ин мулоқоти судманд, ҳамчунин перомуни шароити буду бош ва дурнамои фаъолияти пойгоҳи низомии 201 - и Федератсияи Русия дар Тоҷикистон гуфтугӯ сурат гирифт.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 30.01.15 №: 21 Мутолиа карданд: 2308
