номаҳо
«Сафина» ё ҳамсоя?
Афсӯс, ки сокинони минтақаи Калининободи ноҳияи Ғончӣ аз телевизиону радиоҳои кишвар ба таври бояду шояд баҳра намегиранд. Зеро мавҷҳои онҳо дар ин ҷо хеле заифанд. Агар шабакаи аввал ва «Баҳористон»-ро нисбатан хуб дида тавонем, дар бораи «Сафина» ва «Ҷаҳоннамо» инро гуфта наметавонем. Ин дар ҳолест, ки дар ин минтақа шаш (!) шабакаи телевизионӣ, даҳҳо шабакаи радиои Ҷумҳурии Ӯзбекистони ҳамсоя ниҳоят фаъол аст. Мардуми минтақа асосан барномаи радиову телевизиони кишвари ҳамсояро мебинанду гӯш мекунанд. Таъсири ин ҳолро бараъло мушоҳида кардан мумкин аст. Кӯдаки 4-5 солаи ин ҷо бемалол матлаби барномаҳои телевизиони ӯзбекиро мефаҳмад ва ҳам дар синни 6-7 -солагӣ бо ин забон озодона гуфтугӯ мекунад, аммо ба забони давлатӣ хуб сухан гуфта наметавонад.
Бо ин вазъ чӣ гуна метавон ифтихори милливу ватандории насли наврасро боло бурд? Чандин маротиба ба шахсони масъул муроҷиат карда, хоҳиш намудем, ки дар кори беҳтари фиристандаҳо мусоидат кунанд. Ваъдаҳо ҳам доданд, аммо аз иҷрои онҳо дараке нест…
Раҳимҷон МАШАРИФОВ,
ноҳияи Ғончӣ
Баёни ақида (0) Санаи нашр: №: Мутолиа карданд: 3122
