мулоқотҳо
Ҳамкории порлумонии Тоҷикистону Аврупо
густариш меёбад
8 апрел Президенти Ҷумҳурии Тоҷикистон Эмомалӣ Раҳмон ҳайати кумитаҳои ҳамкории порлумонии Иттиҳоди Аврупоро, ки бо роҳбарии Она Юкневичине бо сафари серӯза ба Тоҷикистон омадааст, ба ҳузур пазируфт.
Сардори давлат Эмомалӣ Раҳмон аз густариши рӯзафзуни муносибатҳои Тоҷикистону Иттиҳоди Аврупо изҳори қаноатмандӣ карда, аз ҷумла таъкид намуд:
-Барои Тоҷикистон омӯхтани таҷрибаи фарохи парламентаризми Аврупо аҳамияти зиёд дорад.
Ба гуфти Она Юкневичине сафари расмии Президенти Ҷумҳурии Тоҷикистон ба шаҳри Брюссели Шоҳигарии Белгия, ки моҳи феврали соли равон сурат гирифта буд ва мулоқоту вохӯриҳои бо ниҳодҳои гуногуни Иттиҳоди Аврупо анҷомдодааш, ба густариши бештари муносибатҳои ҳамкорӣ миёни Тоҷикистону Иттиҳоди Аврупо, аз ҷумла Порлумони Аврупо, такони тоза дод.
-Баъд аз ин мулоқотҳо дар Аврупо фаҳмиши нақши Тоҷикистон дар минтақаи Осиёи Марказӣ, аз ҷумла дар таъмини амнияту суботи минтақа, беҳ шуд, - таъкид намуд Она Юкневичине.
Дар мулоқот ҳамчунин оид ба ҳамкории Тоҷикистону Аврупо дар соҳаҳои энергетика, саноат, нақлиёту коммуникатсия, кишоварзӣ, амнияти минтақавӣ, илму маориф, тандурустӣ, беҳсозии фазои инвеститсионӣ ва таҳкими раванди демократикунонии ҷомеа гуфтугӯйи судманд сурат гирифт.
Мубодилаи афкор ҳамчунин оид ба омодагӣ ба мулоқоти вазирони корҳои хориҷии сегонаи Аврупо бо вазирони корҳои хориҷии кишварҳои Осиёи Марказӣ, ки моҳи майи соли равон дар шаҳри Душанбе баргузор мегардад ва дигар масоили мавриди таваҷҷӯҳ сурат гирифт.
Хотиррасон мекунем, ки манзур аз сегона (тройка)-и Аврупо раисикунандаи гузашта, ҳозира ва ояндаи Иттиҳоди Аврупо мебошад.
Баёни ақида (0) Санаи нашр: №: Мутолиа карданд: 2134
