номаҳо
АСЛИ МАТНҲО ОВАРДА ШАВАНД
Нахустин бор Раёсати маркази исломии Ҷумҳурии Тоҷикистон дар ҳамкорӣ бо Раёсати корҳои оид ба дини Ҷумҳурии Туркия тақвими соли 2015 - ро ба хати кириллӣ ба табъ расонданд. Тақвим маълумоти зиёди динию фарҳангиро дорост. Аз он ба оёти қуръонӣ, ҳадис, масъалаҳои фиқҳӣ, панду арзҳо, моҳҳову рӯзҳои исломӣ ва замони фарорасии намозҳои панҷгона дар манотиқи ҷумҳурӣ метавон ошно шуд. Яъне, мо пештар аз ин чунин як тақвими муфиди иттилоотию омӯзишӣ надоштем. Аз ин рӯ, зарур аст, ки онро хуш бояд истиқбол кард. Мутаассифона, чун кори аввалин аст, ба тақвим баъзе хатоҳо роҳ ёфтанд, ки фикр мекунам, бе зикрашон низ дар солҳои оянда онҳо ислоҳ мегарданд. Аммо чанд иштибоҳу нофаҳмиҳои ҷиддие вуҷуд доранд, ки ёдоварии онҳо зарур аст.
Дар саҳифаҳои аввали тақвим сарсухан бо алифбои лотинӣ ва забони туркӣ мебошад, ки барои ҳама фаҳмо нест. Он ба хати кириллӣ ва забони давлатии мо бояд бошад. Ба ҷуз ин суханони шуаро ва шахсиятҳои барҷастаи форсу тоҷик аз забони туркӣ тарҷума шудаанд. Дар натиҷа ифодаву мазмун халалдор гардидаанд. Масалан, чунин матнеро (12 январ) пешниҳод намудаанд: «Ҳарчи қадар бихоҳӣ, аммо агар тибқи донишат рафтор накунӣ, ҷоҳил ҳастӣ». Дар поёни ин матн номи Саъдии Шерозиро ҷой додаанд. Матни овардашуда мазмуни ин байти Шайх Саъдӣ мебошад:
Илм ҳарчанд бештар хонӣ,
Чун амал дар ту нест, нодонӣ.
Як мисоли дигар аз ин тақвим (14 январ) : «Адаб тоҷе будааст аз Нури Худо, Бипӯш он тоҷрову дар амон бош аз ҳар бало… (Мавлоно).
Ба пиндори ин ҷониб Мавлоно Ҷалолиддини Румӣ чунин гуфтааст:
Адаб тоҷест аз нури Илоҳӣ,
Бинеҳ бар сар, бирав ҳар ҷо, ки хоҳӣ.
Мебояд дар оянда асли матнҳо ба забони тоҷикӣ оварда шаванд, на тарҷумаи онҳо аз забони туркӣ.
Д. ИСМАТУЛЛОЕВ, шаҳри Душанбе
Баёни ақида (0) Санаи нашр: 8.05.2015 №: 95-96 Мутолиа карданд: 1309
