номаҳо
ИН ДИГАР НА ОН НАҚБ АСТ
Ҳанӯз аз ёдам нарафта, ки дар рӯзҳои аввали ба истифода додани нақби ағбаи Чормағзак, ки ҳоло «Хатлон» ном дорад, аз он гузашта будам. Дидани он дар ҳар бор ҳаловати махсус мебахшид. Тозаву барҳаво, бисёр рӯшан буд. Бархе аз дӯстон барои дидани он азми сафари Кӯлоб карда буданд.
Охир набояд дигарон аз ёд бурда бошанд, зеро вақти бисёр нагузаштааст ва дар он шабу рӯз аз дастовардҳои бузурги мо маҳсуб меёфт. Дарозтарину калонтарин нақби кишвар мебошад. Аммо рӯзи 4 - уми апрели соли равон аз он гузаштаму дилам якбора сиёҳу танг шуд. Ин дигар на он нақб буд, ки дар хотираи ман ҷой дошт.
На тоза буду на барҳаво ва на рӯшан. Ягон чароғаш фурӯзон набуд. Дар оғоз пиндоштам, ки дар куҷое хати барқи онро тармим доранд. Аммо шабона, яъне баъд аз даҳ соат низ, ки баргаштем, ҳол тағйир наёфта буд. Ронанда изҳор дошт, ки ин нақби овозадор чандин шабу рӯз бад - ин ҳол аст. Ва ҳам гуфт, ки он дигар дар тавозуни Вазорати нақлиёти ҷумҳурӣ мебошад ва вазорат пул надорад, ки ҳаққи барқро пардохт намояд. Яъне маълум нест, ки нақб кай тозаву барҳавову рӯшан мешавад. Ё маълум асту мо намедонем?
Н. АМОНОВ, ноҳияи Ҳисор
Баёни ақида (0) Санаи нашр: 8.05.2015 №: 95-96 Мутолиа карданд: 1223