порлумон
ИСТЕҲСОЛИ ВАРАҚАҲОИ ГАЧКАРТОН БА РОҲ МОНДА МЕШАВАД
Дар ҷаласаи Маҷлиси намояндагони Маҷлиси Олӣ, ки таҳти раёсати Шукурҷон Зуҳуров, Раиси Маҷлиси намояндагон, гузашт, ба се қонуни Ҷумҳурии Тоҷикистон тағйиру иловаҳо ворид гардиданд.
Меҳринамо Ҷонмаҳмадова, муовини вазири молия, зимни ба тасвиб расидани лоиҳаи Қонуни Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2015» иброз дошт, ки 12 ноябри соли гузашта Президенти мамлакат дар ҷараёни сафари корӣ ба ноҳияи Ёвон ба сохтмони корхонаи истеҳсоли варақаҳои гачкартонӣ санги асос гузошт.
Бо қарори Ҳукумати Ҷумҳурии Тоҷикистон лоиҳаи қонуни мазкур маъқул дониста шуда, ба баррасии Маҷлиси намояндагон пешниҳод гардид.
Назар ба гуфтаи мавсуф, мувофиқи лоиҳа озод намудани воридоти таҷҳизот, технология ва маҳсулоти сохтмонии ҶДММ «Хуаҷиан Ғаюр индастрал» аз пардохти андоз аз арзиши иловашуда ва боҷи гумрукӣ пешбинӣ шудааст. Ҷамъият тасмим гирифтааст, ки дар ноҳияи Ёвон Корхонаи истеҳсоли варақаҳои гачкартонӣ ва ғурагачро бо сармоягузории 130 миллион сомонӣ дар муддати якуним - ду сол бунёд намояд.
Муовини вазир зикр кард, ки аз рӯи маълумоти ҷойдошта ҷамъият бояд дар моҳи июли соли ҷорӣ навбати аввали корхонаро бо иқтидори истеҳсолии 10 ҳазор дона варақаи гачкартон дар як шабонарӯз ба кор дарорад. Бо ҷойи кори доимӣ таъмин кардани 350 нафар дар назар дошта шудааст. Маблағи умумии воридоти таҷҳизот, технология ва маҳсулоти сохтмонӣ 18 миллион доллар буда, маблағи озодшавӣ аз андоз ва боҷи гумрукӣ ба 4,3 миллион доллар мерасад.
Назар ба гуфтаи Акбар Ғуломов, директори ҶДММ «Хуаҷиан Ғаюр индастрал», як қисми маҳсулот ба Ҷумҳурии исломии Афғонистон содир мегардад.
Неъматулло Ҳикматуллозода, вазири рушди иқтисод ва савдо, зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи савдо ва хизматрасонии маишӣ» гуфт, ки мақсад аз он аз байн бурдани мухолифати ҷойдошта бо дигар қонунҳо мебошад. Дар лоиҳаи пешниҳодшуда ба қисми 9 моддаи 10, инчунин ба қисми 21 моддаи 14 тағйирот ворид шуд.
Ҳамчунин ба Қонуни Ҷумҳурии Тоҷикистон «Дар бораи фаъолияти савдои ҷумҳурӣ» илова ворид шуд.
Неъматулло Ҳикматуллозода иброз дошт, ки он ба мақсади васеъ ва мушаххас намудани ваколатҳои Ҳукумати Ҷумҳурии Тоҷикистон дар мавриди анҷом додани савдои наздисарҳадӣ таҳия шудааст.
Мунаввари САФАР, «Ҷумҳурият»
Баёни ақида (0) Санаи нашр: 29.05.2015 №: 111 Мутолиа карданд: 2526
