номаҳо
ЗАБОН – РУКНИ АРЗИШҲОИ МИЛЛӢ
Имрӯз давлати соҳибистиқлоли Тоҷикистонро аксарияти давлатҳои ҷаҳон ба расмият мешиносад. Ин чунин маъно дорад, ки ҷаҳон забони давлатии моро низ якҷоя бо давлатдории мо ба расмият шинохтааст. Ба ин забон санадҳои ҳуқуқии байналмилалӣ ва осори илмиву адабии халқҳои ҷаҳон тарҷума мешаванд, созишномаҳо ва қарордодҳои муҳими байналмилалӣ таҳия мегарданд, дар минбарҳои бузург ва муътабари ҷаҳонӣ забони давлатӣ танинандоз аст ва дар сатҳи ҷаҳонӣ беш аз пеш маъруфият касб менамояд. Ҳамаи ин моро водор месозад, ки ба забони худ арҷ гузорем ва барои рушду такомули он ҳамаи шароити заруриро муҳайё гардонем. Бояд кӯшиш кунем, ки забони худро ба забони фарогири корӣ ва муошират, яъне ба забоне, ки ҷавобгӯи ҳамаи ниёзҳои даврони истиқлол ва давлати мустақил бошад, табдил диҳем. Аммо дар шароити ҳозира бархе аз шахсон пас аз сафарҳо ба хориҷи кишвар ё кору фаъолият намудан бо хориҷиён урфу одати миллӣ ва забони модарии худро гум мекунанд ва худро ба онҳо шабоҳат медиҳанд. Дӯст доштану ҳифз кардани ин сарзамини аҷдодӣ, ободу зебо гардондани ватани биҳиштосо, неруманду пуриқтидор сохтани давлати тоҷиконро бояд ҳар як фарзанди бонангу номуси ин марзу бум вазифаи имониву виҷдонии худ шуморад ва дар ҳама ҷой бо сарбаландӣ изҳор намояд, ки «Ман тоҷикам»!
Ҷамил Валиев, муовини сардори шуъбаи илмӣ-таҳқиқотии Китобхонаи миллии Тоҷикистон
Баёни ақида (0) Санаи нашр: 4.06.2015 №: 115 Мутолиа карданд: 1227
