номаҳо
ХОНА ДОРАМУ БЕХОНААМ
Ман сокини шаҳраки Ғончӣ мебошам. Соли 1996 бо шаҳрванд Аброров Эҳром Зайниддинович (шаҳодатномаи ақди никоҳ, № 78 аз 30 октябри соли 1996) ба шавҳар баромадам. Аз ин никоҳ ду фарзанд: як духтару як писар дорем. Дар хонаи худ, ки дар гузари Файзобод буд, то соли 2005 зиндагӣ кардем. Бо сабаби вазнин будани рӯзгор ҳамсарам ба Русия рафт. Сипас модари ӯ ҳамроҳи ду фарзанди дигараш ба ин кишвар рафтанд. Баъд қисми зиёди сару либосамро дар хона гузошта, дарро маҳкам кардаму бачаҳоро ба модарам супурда, ба Русия ба ҷустуҷӯи ҳамсарам баромадам. Дар он ҷо камтар кор карда, ҳамсарамро, ки шиноснома надошт, ба зодгоҳ фиристодам ва пас аз шаш моҳ худам ҳам баргаштам. Ҳамсарам пас аз гирифтани шиноснома боз ба Русия рафт ва то имрӯз барнагаштааст. Ман ба назди шавҳарам боз ба Русия рафтаму кор карда омадам. Баъди вафоти модарам ба назди шавҳарам рафта натавонистам. Ман ба хонаи давраи арӯсиям омадам, вале аммаи шавҳарам «рафтӣ-мӣ, дигар набиё» гуфта, нагузошт, ки ба хона дароям. Падари шавҳарам дар он хона то соли 2013 зиндагӣ кард. Вақти зиндагиаш ман ва фарзандонам ҳар вақт омада ӯро хабар мегирифтем…
Ин хона ба аммаю амаки ҳамсарам тааллуқ надорад. Аммо аммаи ҳамсарам дар он як корманди ШКД-и ноҳияро иҷоранишин кардааст. Ин хонаро баъд раиси Ҷамоати шаҳраки Ғончӣ ва КФББТ-и шаҳри Истаравшан ба номи Аброр Салоҳуддинов, бобои ҳамсарам, номнавис кардаанд. Ҳол он ки ӯ соли 2008 вафот намудааст. Мани зинда бехонаю шахси аз олам рафта соҳиби хона.
Ман аз ин ноадолатиҳо ба суди ноҳиявӣ, вилоятӣ, прокуратураи ноҳиявӣ, вилоятӣ ва ҷумҳуриявӣ мактубҳо фиристодам. Вале пас аз ман аммаи ҳамсарам Мавлуда Салоҳуддинова ба он даргоҳҳо мераваду вазъро дигар карда меояд.
Ба гӯшаи «Розу ниёз»-и рӯзномаи «Ҷумҳурият» ин номаро бад-он хотир навиштам, то масъулон қазияро дуруст ва боадолатона ҳал бикунанд.
Санавбар Маматқулова, сокини ноҳияи Ғончӣ
Баёни ақида (0) Санаи нашр: 4.06.2015 №: 115 Мутолиа карданд: 1380
