мулоқотҳо
ПРЕЗИДЕНТИ КИШВАР ВАЗИРИ АМНИЯТИ ҶАМЪИЯТИИ ҶУМҲУРИИ МАРДУМИИ ЧИНРО БА ҲУЗУР ПАЗИРУФТ
5 - уми июн Президенти кишвар Эмомалӣ Раҳмон вазири амнияти ҷамъиятии Ҷумҳурии Мардумии Чин Го Шанкунро, ки ҷиҳати ширкат дар мулоқоти вазирони корҳои дохилии кишварҳои аъзои Созмони ҳамкории Шанхай ба Тоҷикистон ташриф овардааст, ба ҳузур пазируфт.
Дар суҳбати тарафайн масоили ҳамкории дуҷонибаи Тоҷикистону Чин дар соҳаи амният ва ҳифзи ҳуқуқу тартибот баррасӣ шуд.
Сарвари давлат Эмомалӣ Раҳмон ба ҷониби Чин барои кумакҳои пайвастаи техникӣ ва саҳмгузорӣ дар омодасозии кадрҳои баландихтисоси ин соҳаҳо арзи сипос намуда, таъкид дошт, ки ҳамгироии босамари ду кишвари дӯсту ҳамсоя ба таҳкими амну субот дар минтақа ва муборизаи беамон бо унсурҳои терроризму экстремизм, гардиши ғайриқонунии маводи мухаддир ва яроқу аслиҳа мусоидати босамар мекунад.
Бино ба таъкиди Го Шанкун Ҷумҳурии Мардумии Чин омода аст, ки минбаъд ҳам аз рушди босуботи Тоҷикистон чун ҳамсояи боэътимоди худ ва узви фаъоли Созмони ҳамкории Шанхай ҳамаҷониба пуштибонӣ намояд.
Ҳарду ҷониб доир ба тамоми масоили мавриди таваҷҷуҳ гуфтугӯйи судманд анҷом дода, ҳавасмандии хешро ба таҳким ва густариши ҳамкории самарабахш таъкид доштанд.
Баёни ақида (0) Санаи нашр: 9.06.2015 №: 118 Мутолиа карданд: 1043
