мулоқотҳо
ВАЗИРИ НЕРУИ ҶУМҲУРИИ ИСЛОМИИ ЭРОН БА ТОҶИКИСТОН ОМАД
Нимаи аввали рӯзи 8 – уми июн Президенти кишвар Эмомалӣ Раҳмон вазири неруи Ҷумҳурии Исломии Эрон Ҳомид Читчиёнро ба ҳузур пазируфт.
Сарвари давлат Эмомалӣ Раҳмон дар оғози суҳбат изҳор дошт: “Тоҷикистон аз он қаноатманд аст, ки солҳои охир дар ҷодаи робитаҳои иқтисодии ду кишвар ҳамкории бунёдӣ мақоми асосӣ пайдо кардааст”. Тазаккур дода шуд, ки ҳоло дар Тоҷикистон беш аз 150 ширкати эронӣ фаъолияти босамар доранд. Мубодилаи молу коло дар миёни Тоҷикистону Эрон дар соли 2014 зиёда аз 228 миллион долларро ташкил дод, ки ин баробар ба 4,3% тиҷорати хориҷии Тоҷикистон дар соли равон аст.
Бо изҳори ризоият зикр гардид, ки ҳамкории Тоҷикистону Эрон дар арсаҳои бунёдии энергетика ва тавлиди зербинои нақлиётӣ – дар баробари робитаҳои сиёсӣ ва фарҳангӣ - ҷанбаи муҳимтарини муносиботи ду кишвар мебошад.
Изҳори итминон гардид, ки бо истифода аз таҷрибаи муштараки сохтмони Неругоҳи обии «Сангтӯда - 2» ҷониби Эрон дар бунёди дигар неругоҳҳои Тоҷикистон ҳам саҳмгузор хоҳад буд.
Инчунин густариши робитаҳои сеҷонибаи Тоҷикистону Эрону Афғонистон, аз ҷумла равнақи сохтмони роҳи оҳан ва кашидани хати барқии баландшиддат ва лӯлаи оби ошомиданӣ миёни се кишвар, мавриди таваҷҷуҳи хоси ҷонибҳо қарор гирифт.
Баёни ақида (0) Санаи нашр: 9.06.2015 №: 118 Мутолиа карданд: 1164
