мулоқотҳо
ТОМАС БАХ АЗ ВАРЗИШГАРОНИ ТОҶИК ПИРӮЗИҲОИ ЗИЁД ИНТИЗОР АСТ
Эмомалӣ Раҳмон, Президенти Ҷумҳурии Тоҷикистон, нимаи дуюми рӯзи 15 июн Президенти Кумитаи байналмилалии олимпӣ Томас Бах ва раиси Шӯрои олимпии Осиё Шайх Аҳмад ал - Фаҳад ас - Сабоҳро ба ҳузур пазируфт.
Зимни мулоқот масоили вобаста ба рушди ҳаракати олимпӣ дар Тоҷикистон, тарғибу ташвиқи васеи мардум, хусусан ҷавонон ба тарзи ҳаёти солим дар меҳвари таваҷҷуҳ қарор гирифт.
Тибқи иттилои Хадамоти матбуоти Президенти ҷумҳурӣ, Сарвари давлат ба Кумитаи байналмилалии олимпӣ ва Шӯрои олимпии Осиё, ки дар рушди ҳаракати олимпӣ дар Тоҷикистон саҳми арзанда мегузоранд, арзи сипос намудааст. Бар пояи гузориши манбаъ, доир ба роҳҳои бунёди марказҳои омодагии олимпӣ дар Тоҷикистон гуфтугӯи судманд сурат гирифта, таъкид шудааст, ки дар марҳалаи аввал сохтмони панҷ адад чунин марказҳо дар гӯшаҳои гуногуни кишвар мувофиқи матлаб аст.
Президенти Кумитаи байналмилалии олимпӣ Томас Бах ва раиси Шӯрои олимпии Осиё Шайх Аҳмад ал - Фаҳад ас – Сабоҳ баъд аз мулоқот бо Президенти мамлакат ба хабарнигорон изҳор доштанд, ки бо Сарвари давлат суҳбати судманду бисёрпаҳлу анҷом додаанд. Аз ҷумла Томас Бах гуфт: «Мо ба ин назар будем, ки варзиш бояд меҳвари солимии ҷомеа ва омили ҳамбастагиву ваҳдат бошад. Дар ҷараёни суҳбат Эмомалӣ Раҳмон аз сиёсату барномаҳои феълии Кумитаи байналмилалии олимпӣ, аз ҷумла эмин доштани дастаҳои варзишӣ аз истифодаи воситаҳои допингӣ ҷонибдорӣ намуданд».
Томас Бах ҳамчунин изҳор дошт, ки Кумитаи байналмилалии олимпӣ ва Шӯрои олимпии Осиё барномаҳои вижаеро оид ба дастгирии варзишгарони тоҷик рӯи даст доранд ва дар ин замина ба Кумитаи миллии олимпӣ ва варизшгарони Тоҷикистон тавассути сармоягузорӣ дар бунёди иншооти варзишӣ, таъмини таҷҳизоти зарурӣ, мусоидат дар шинохти сиёсати олами варзиш ва ҳаракати ҷаҳонии олимпӣ, ҷудо намудани идрорпулиҳо ба варзишгарони умедбахш ёрӣ ҳоҳанд кард. Президенти Кумитаи байналмилалии олимпӣ Томас Бах изҳори бовар намуд, ки варзишгарони тоҷик бо истифода аз шароити мусоид, минбаъд дар бозиҳои олимпию осиёӣ ва дигар мусобиқоти ҷаҳонӣ ба натиҷаҳои бештару хубтар ноил мегарданд.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 17.06.2015 №: 124 Мутолиа карданд: 1055
