маориф
СУҒД. ЧАРО ҶАВОНОН МУАЛЛИМ БУДАН НАМЕХОҲАНД?
(На ҳама хатмкардагони тахассуси омӯзгорӣ ба ҷои кор ҳозир мешаванд)
Донишгоҳи давлатии Хуҷанд ба номи академик Бобоҷон Ғафуров 4 нафар хатмкардагони тахассуси омӯзгорӣ - Саъдулло Ғайбуллоев, Пӯлод Сиддиқов, Акобир Додоҷонов ва Абдушукур Устобоевро ба суд дод. Онҳо бояд мувофиқи рӯйхати тақсимоти хатмкардагони гурӯҳи буҷетӣ ва роҳхати Вазорати маориф ва илми Ҷумҳурии Тоҷикистон ба мактаби муайяншуда ба кор мерафтанд. Аммо ин ҷавонон аз фаъолияти омӯзгорӣ саркашӣ кардаанд. Судҳои ноҳияи Айнӣ ва шаҳри Хуҷанд бо қарори худ онҳоро водор сохтанд, ки маблағи умумии 32 ҳазору 288 сомониро, ки давлат барои таълимашон сарф кардааст, бозгардонанд.
Боиси нигаронист, ки чунин амали номатлуб аз ҷониби мутахассисони ҷавони ин соҳаи муҳими иҷтимоӣ солҳои охир зиёд ба чашм мерасад. Бино ба иттилои Аҳмадҷон Солеҳҷонов, мудири шуъбаи кадрҳо ва корҳои махсуси Раёсати маорифи вилояти Суғд, соли 2014 зиёда аз 40 нафар мутахассис аз фаъолияти омӯзгорӣ сар печиданд. Ин дар ҳолест, ки феълан мактабҳои таҳсилоти миёнаи умумии вилоят ба 900 омӯзгор ниёз доранд.
Чунин амал ва ё тасмими мутахассисони ҷавонро чӣ гуна метавон арзёбӣ кард?
Коршиносон вобаста ба омилҳои асосии ин раванд андешаҳои гуногун доранд:
- Дар фаъолияти корӣ ҳаҷми музди меҳнат ва таъмини имтиёзҳои иҷтимоӣ нақши калидӣ дорад, - мегӯяд Юсуфҷон Ҷумъабоев, раиси кумитаи иттифоқи касабаи кормандони соҳаи маорифи вилояти Суғд. – Албатта, дар даҳ соли охир бо ғамхории Ҳукумат ва давлати Тоҷикистон вазъи соҳаи маориф хеле беҳтар шуд. Аз ҷумла, соли равон, дар моҳи сентябр то 20 дарсад маош баланд бардошта мешавад. Имрӯз омӯзгор бо тахассуси олии педагогӣ то 800 сомонӣ маош мегирад ва ин раванд ҳамасола тамоили афзуншавӣ дорад.
Ба омӯзгорони ҷавон мутобиқи Қонуни Ҷумҳурии Тоҷикистон «Дар бораи маориф» ҳар сол таваҷҷуҳ зоҳир мегардад. Масалан, соли 2014 ба 93 нафар омӯзгорони ҷавон қитъаи замини наздиҳавлигӣ ҷудо ва ба 30 нафар ба маблағи 180 ҳазор сомонӣ қарзҳои имтиёзноки бонкӣ пешниҳод шудаанд. Соли равон ҳам 35 нафар соҳиби қитъаи замин ва 43 нафар аз қарзи имтиёзноки бонкӣ бархӯрдор гаштанд. Фикр мекунам, тарғиби ин касби пурифтихорро бештару беҳтар намудан зарур аст. То ҷавонону наврасон дар симои муаллим чун солҳои пеш идеали худро дида тавонанд
- Соли равон 17 нафар омӯзгорони ҷавон қитъаи замини наздиҳавлигӣ ва 6 нафар қарзи бонкиро ноил шуданд,- мегӯяд Муяссар Ҳайдаров, мудири шуъбаи маорифи шаҳри Қайроққум,- баъдан дар масъалаи ҳозиршавии мутахассисони ҷавон дар ҷои кор тарғибу корҳои фаҳмондадиҳии муассиртар бо фарогири дарки моҳияти масъала зарур аст.
- Омӯзгорони собиқадор Баҳринисо Усмонова ва Ҳоҷалой Комбоева иллати дилгарм набудани мутахассисони ҷавонро ба фаъолияти муаллимӣ дар басанда набудани тарғибу ташвиқ дар шуъбаҳои маориф медонанд.
- Аз имтиёзҳо на ҳамаи омӯзгорони ҷавон огоҳанд,- мегӯянд онҳо - Фақат дар се соли охир дар вилоят 139 иншооти соҳаи маориф, аз ҷумла 31 мактаби нави замонавии ҷавобгӯй ба талаботи замон, 663 синфхонаҳои нав барои 17 ҳазору 761 ҷой бунёд ёфтанд, ки ин рақамҳо худ аз таваҷҷуҳи пайвастаи давлат гувоҳӣ медиҳанд.
Кор дар мактабҳои муҷаҳҳаз бо воситаҳои аёнӣ, синфхонаҳои озода ба омӯзгорон ҳаловат мебахшад. Танҳо ҷавононро ба касб дилгарм карда тавонистан лозим аст.
Ҷовиди АШТӢ, «Ҷумҳурият»
Баёни ақида (0) Санаи нашр: 4.07.2015 №: 136 Мутолиа карданд: 1460
