мулоқотҳо
Президент муовини котиби давлатии ИМА-ро ба ҳузур пазируфт
Нимаи дуюми рӯзи 20 апрел Президенти Ҷумҳурии Тоҷикистон Эмомалӣ Раҳмон муовини котиби давлатии Иёлоти Муттаҳидаи Амрико Ричард Баучерро ба ҳузур пазируфт.
-Тоҷикистон ба рушди мунтазами муносибатҳо бо Амрико дар ҳамаи самтҳои мутақобилан судманди ҳамкорӣ манфиатдор аст, - изҳор дошт дар оғози сӯҳбат Сардори давлат Эмомалӣ Раҳмон.
-Маъмурияти нави Иёлоти Муттаҳидаи Амрико ва Президент Барак Обама ба ҳамкорӣ бо Тоҷикистон манфиатдоранд, аз ҷумла дар татбиқи стратегияи нав оид ба Афғонистону Покистон, - изҳор дошт Ричард Баучер.
Президенти мамлакат Эмомалӣ Раҳмон аз сатҳи муносибатҳои дуҷониба дар соҳаҳои сиёсат ва амният изҳори қаноатмандӣ намуда, таъкид дошт, ки «дар марҳилаи кунунӣ таваҷҷӯҳи асосӣ бояд ба таҳкиму густариши ҳамкориҳои иқтисодӣ-тиҷоратӣ равона гардад».
Ба гуфти Эмомалӣ Раҳмон, ҳамгироии бештари иқтисодии Тоҷикистону Амрико на танҳо ба манфиати ду кишвар, балки ба манфиати ҳамаи кишварҳои минтақа хоҳад буд, аз ҷумла барои таъмини оромию субот дар Афғонистон.
Гуфтугӯи судманд атрофи татбиқи ҳадафҳои Стратегияи нави Амрико оид ба Афғонистону Покистон сурат гирифт. Аз ҷумла таъкид гардид, ки татбиқи амалии лоиҳаҳои гидроэнергетикӣ ва коммуникатсионии Тоҷикистон метавонад ба барқарорсозии иқтисодиёти Афғонистон ва таъмини Афғонистону Покистон ба нерӯи барқ мусоидати фаъол намояд.
-Тоҷикистон ҳамчунин метавонад дар омодасозии мутахассисони соҳаҳои гуногун барои Афғонистон саҳми намоён гузорад ва ҳам мутахассисони худро ба барқарорсозии иқтисодиёти он сафарбар намояд, - таъкид намуд Эмомалӣ Раҳмон.
Оид ба таҳкими ҳифзи сарҳади давлатии Тоҷикистону Афғонистон, пешгирии гардиши ғайриқонунии маводи мухаддир, дигар хатарҳо ва расондани кӯмакҳои техникӣ ба Қӯшунҳои сарҳадӣ ва дигар сохторҳои дахлдор низ табодули назар карда шуд.
Ҷонибҳо ҳамчунин омодагии худро баҳри тавсеаи робитаҳо барои эҷоди фазои мусоиди ҳамкорӣ дар минтақаи Осиёи Марказӣ ва дигар самтҳои судманд таъкид намуданд.
Ричард Баучер, муовини котиби давлатии Иёлоти Муттаҳидаи Амрико, пас аз мулоқот бо Эмомалӣ Раҳмон, Президенти Ҷумҳурии Тоҷикистон, ба хабарнигорон гуфт, ки мо бо Ҷаноби Олӣ дар бораи рушди муносибатҳои мутақобилан судманди кишварҳоямон табодули назар намуда, вазъи феълии Афғонистон ва сиёсати маъмурияти нави ИМА-ро вобаста ба ҶИА мавриди баррасӣ қарор додем.
Яке аз вазифаҳои аввалиндараҷаи мо таҳким бахшидани равобити гуногунсоҳа бо тамоми кишварҳои минтақа аст. Аз ин лиҳоз, мо имрӯз бештар ба масоили таъмини амнияти комил дар сарҳад, гузоштани садди устувор дар роҳи қочоқи маводи мухаддир, фароҳам овардани шароити мусоид барои рушди иқтисодиёти Афғонистон, мусоидат ба ҳифзи иҷтимоии аҳолии он, таъмини транзити борҳои ғайринизомии аз Амрико тавассути қаламрави Тоҷикистон ба ин кишвар интиқолшаванда таваҷҷӯҳ зоҳир намудем.
Иёлоти Муттаҳидаи Амрико шарики хуб, нерӯманд ва боэътимоди Тоҷикистон ҳам дар масъалаҳои таъмини амният ва ҳам дар татбиқи барномаҳои ислоҳоти иқтисодӣ мебошад. Бесабаб нест, ки мо бо Ҷаноби Олӣ имконот ва роҳҳои густариши ҳамкориҳои дуҷонибаро дар ин самтҳо матраҳ сохтем.
Ман ба Президенти кишвари шумо гуфтам, ки Барак Обама, Президенти ИМА, мутаваҷҷеҳи рушди муносибатҳои гуногунҷанба бо Тоҷикистон аст.
Додоҷон Рӯзиев, «Ҷумҳурият»
Баёни ақида (0) Санаи нашр: №: Мутолиа карданд: 2065
