мулоқотҳо
Ҳамкориҳои иқтисодию
тиҷоратии Тоҷикистону
Австралия рушд меёбанд
23 апрел Президенти Ҷумҳурии Тоҷикистон Эмомалӣ Раҳмон аз Сафири фавқулодда ва мухтори Австралия дар Тоҷикистон Маргарет Эйлин Тумӣ эътимоднома қабул намуд.
Зимни сӯҳбати Сардори давлат Эмомалӣ Раҳмон бо Маргарет Эйлин Тумӣ масоили ҳамкории Тоҷикистону Австралия баррасӣ ёфтанд.
Таъкид гардид, ки Тоҷикистону Австралия ҳамчунин метавонанд робитаҳои густурдаи сиёсӣ дар чаҳорчӯби Созмони Милали Муттаҳид ва дигар созмонҳои байналмилалӣ дошта бошанд.
-Мубодилаи тиҷоратии миёни ду кишвар, ки ҳаҷми он дар соли гузашта наздики 35 миллион доллари ИМА-ро ташкил дод, нишона аз имконоти васеи рушди ҳамкориҳои иқтисодию тиҷоратӣ миёни Тоҷикистону Австралия аст, - изҳор дошт Президенти мамлакат Эмомалӣ Раҳмон.
Мусоҳибон баҳри тавсеаи ҳамкориҳои иқтисодӣ дар соҳаҳои гидроэнергетика, саноат, кишоварзӣ ва истихроҷи нафту газ дар Тоҷикистон ҳавасмандӣ зоҳир намуданд.
Дар мулоқот атрофи авзои кунунии Афғонистон ва мубориза бо терроризм, экстремизм ва гардиши ғайриқонунии маводи мухаддир табодули назар шуд.
х х х
- Мо бо Ҷаноби Олӣ Эмомалӣ Раҳмон, Президенти Ҷумҳурии Тоҷикистон, дар баробари матраҳ намудани масъалаҳои вобаста ба тавсеаи ҳамкориҳои дуҷониба, ҳамзамон имкониятҳои густариши муносибатҳоямонро дар сатҳи минтақавӣ ва байналмилалӣ мавриди баррасӣ қарор додем, - гуфт Сафири фавқулодда ва мухтори Австралия дар Тоҷикистон хонум Маргарет Эйлин Тумӣ зимни вохӯрӣ ба намояндагони воситаҳои ахбори омма.
Масоили марбут ба терроризм, хариду фурӯши одамон, ҳуқуқи инсон, гардиши ғайриқонунии маводи мухаддир, ки сарчашмааш Афғонистон аст, дар маркази таваҷҷӯҳи мо қарор дошт. Мо талошҳои пайгиронаи Тоҷикистонро дар роҳи ҳалли ин мушкилот чи дар сатҳи минтақавӣ ва чи дар доираи чорабиниҳои созмонҳои бонуфузи байналмилалӣ, ба вижа СММ қадр менамоем.
Додоҷон РӮЗИЕВ, «Ҷумҳурият»
Баёни ақида (0) Санаи нашр: №: Мутолиа карданд: 2079