туризм
ИҚТИДОРИ ТУРИЗМИ ЗИМИСТОНА ПУРРА ИСТИФОДА НАМЕШАВАД
Дар асоси таҳлили ҳамаҷонибаи мутахассисони соҳа, дар баробари як қатор навъҳои ҷаҳонгардӣ, варзиши лижаронии кӯҳӣ низ ҳамчун самти афзалиятноки сайёҳӣ арзёбӣ шудааст. Ин дар ҳолест, ки дар мамлакат танҳо як пойгоҳи кӯҳии лижаронии «Сафедорак» амал менамояд. Ва тибқи маълумоти дастрас ҳар сол аз дохил ва хориҷи кишвар хоҳишмандон вориди он гардида, машғули машқу машғулиятҳои лижатозӣ мешаванд. Дар «Сафедорак» ба қадри имкон инфрасохтори зарурӣ мавҷуд аст, вале он талаботи сайёҳи муосирро қонеъ гардонда наметавонад. Ин аст, ки дар фасли зимистон ба он сӯ аслан шавқмандони варзиши зимистона ва варзишгарон сафар мекунанд. Ташрифи сайёҳони хориҷӣ ба «Сафедорак» аксаран дар доираи туризми коргузорӣ ё дигар навъи он сурат мегирад.
Ин ҷо суоле пайдо мешавад, ки дар чунин вазъ ба роҳ мондани туризми зимистона, яъне, варзиши лижаронии кӯҳӣ чӣ зарурат дорад ва оё метавон ин навъи саёҳатро дар кишвар рушд бахшид?
Дар ин хусус Мулло Абдол Шагарф, раиси ширкати «Помир силк тревел», дар суҳбати телефонӣ ба мо гуфт, ки феълан туризми зимистонаро метавон дар пойгоҳи кӯҳии «Сафедорак» ва барои дӯстдорони барф дар шаҳри Душанбе барои се – чор рӯз ташкил кард. Ғайр аз ин, дар санаторияҳои «Оби-Гарм», «Гармчашма» ва дигар ҷойҳо туризми зимистонаи табобатиро ривоҷ бахшидан мумкин. Ба гуфти ӯ дар дигар мавзеъҳо ба роҳ мондани туризми зимистона бағоят душвор аст. Зеро, пеш аз ҳама, инфрасохтори ҷавобгӯй ба талаботи замони муосир дар мавзеъҳои туристӣ нест. Дигар ин ки дар фасли зимистон роҳҳои Бадахшону Зарафшон, ки сайёҳон аслан ба ҳамин минтақаҳо сафар мекунанд хавфнок мегарданд, ҳатто чанд рӯз роҳҳо банд мемонанд. Дар ин гуна вазъ ҷалби сайёҳон ба манфиати кор нахоҳад буд. Ниҳоят, ташрифи ҳар сайёҳ «аз» ва «то» дорад, яъне, сайёҳ муҳлати муайян бояд дар Тоҷикистон бимонад ва дар ин муддат аз ҷойҳои ба нақша гирифташуда дидан намояд. Аз ин хотир, мо наметавонем туризми байналмилалии зимистонаро дар кишвар ба таври бояду шояд роҳандозӣ намоем.
Раҷабалӣ Турсунзода, мудири бахши ҷавонон, варзиш ва сайёҳии ноҳияи Варзоб, иброз медорад, ки пойгоҳи кӯҳии «Сафедорак» аслан барои варзиши лижатозӣ пешбинӣ шудааст. Ин аст, ки он ҷо бештар машқҳои варзишӣ ва лижатозӣ гузаронда мешаванд. Бо вуҷуди ин, соле дар фасли зимистон ба ин мавзеъ то 3 ҳазор сайёҳ ва дар маҷмӯъ, 5-6 ҳазор нафар ташриф меоранд. Айни ҳол, бо дастгирии Кумитаи ҷавонон, варзиш ва сайёҳиву мактаби варзишӣ дар ин мавзеъ корҳои сохтмониву барқарорсозӣ оғоз гаштаанд. Тибқи нақша аввал роҳ таъмир мегардад, сипас, хостел барои гардишгарон сохта мешавад, баъдан, дигар иншооти зарурӣ бунёд хоҳанд ёфт.
Сафедорак тақрибан 38 километр аз шаҳри Душанбе дур, дар баландии 2200 метр аз сатҳи баҳр, дар болооби дарёи Варзоб доман густурдааст. Барф дар ин мавзеъ аз моҳи ноябр то моҳи май боқӣ монда, баландии он ба 2,5 метр мерасад. Сафедорак барои гузарондани машқҳои варзишӣ ва фароғати зимистона мувофиқ мебошад. Зеро, дар он ҷо Ассотсиатсияи варзиши лижаронии кӯҳӣ ва меҳмонхона ҷой гирифтаанд.
Тавре мутахассисони соҳа иброз медоранд, то оне ки роҳҳо таъмир нагарданд, мавзеъҳои туристӣ бо барқ таъмин нашаванд ва инфрасохтори ҷавобгӯй ба талаботи ҷаҳонӣ бунёд наёбад, рушди туризми зимистона ғайри имкон аст.
Гуфтан ба маврид аст, ки дар банди 23 – и Барномаи рушди туризм дар Ҷумҳурии Тоҷикистон барои солҳои 2015 - 2017 омадааст, Кумитаи ҷавонон, варзиш ва сайёҳӣ ҷиҳати таҷдиди Пойгоҳи кӯҳии «Сафедорак» лоиҳаи махсус таҳия намуда, барои ворид намудан ба рӯйхати лоиҳаҳои инвеститсионӣ ба Кумитаи давлатии сармоягузорӣ ва идораи амволи давлатӣ ирсол намудааст. Айни ҳол он дар ҳамоишҳои сармоягузорони ватанию хориҷӣ ба баррасии шарикони потенсиалӣ манзур мегардад. Итминон дорем, ки масъалаи таҷдиди пойгоҳи кӯҳии лижаронии «Сафедорак» ҳалли худро меёбад ва сармоягузорон бо дарки муҳимияти он ҳатман ба таҷдиду навсозиаш саҳм мегузоранд.
Тибқи иттилои раёсати рушди туризми Кумитаи ҷавонон, варзиш ва сайёҳӣ, дар 3 моҳи аввали соли ҷорӣ ба кишвар 63 ҳазору 320 сайёҳ ташриф овардаанд, ки нисбат ба ҳамин давраи соли гузашта 27 ҳазору 207 нафар зиёд мебошад. Аз онҳо ба буҷети мамлакат 31 миллиону 660 ҳазор доллар ворид шудааст. Рақамҳо бозгӯйи онанд, ки туризми зимистона ҳам дар кишвар пеш рафта истодааст. Агар инфрасохтори зарурӣ дар мавзеъҳои кӯҳӣ бунёд мешуд, шояд аз ин имкони фаровон суди бештаре метавон дид.
Ш. ҚУРБОН,
«Ҷумҳурият»
Баёни ақида (0) Санаи нашр: 12.08.2015 №: 162-163 Мутолиа карданд: 12045
