муҳоҷират
Муҳоҷирони шаҳри
Турсунзода мадад
Мехоҳанд
Мақолаи хабарнигор Убайдуллои Мурод «Муҳоҷирони шаҳри Турсунзода мадад мехоҳанд», дар ҷаласаи Корхонаи воҳиди давлатии «Хоҷагии манзилию коммуналӣ» мавриди муҳокима қарор гирифт.
Дар асоси банди 4-и Қарори Ҳукумати Ҷумҳурии Тоҷикистон аз 31 январи соли 2006, № 75 «Дар бораи кӯчонидани 1000 оилаи муҳоҷирони дохилӣ (ихтиёрӣ) аз шаҳру ноҳияҳои вилояти Хатлон ба шаҳри Турсунзода» иҷрои корҳои бо оби нӯшиданӣ таъмин намудани муҳоҷирон, гузаронидани хати лӯлаҳои об ба маҳалли нави зисти муҳоҷирон дар шаҳри Турсунзода ба зиммаи Вазорати мелиоратсия ва захираҳои оби Ҷумҳурии Тоҷикистон вогузор шуда буд.
КВД «Хоҷагии манзилию коммуналӣ» аз ин маъракаи муҳими аҳамияти ҷумҳуриявидошта дар канор намонда, тасмим гирифт, ки дар ду маҳал корҳои бо оби нӯшиданӣ таъмин намуданро аз ҳисоби маблағҳои мутамарказ ба зиммаи худ гирад. Соли 2007 корҳои тадқиқотӣ-лоиҳавӣ оғоз гардида, ҳуҷҷатҳои лоиҳавию харҷномавӣ таҳия шуданд.
Ҳаҷми корҳои иҷрошуда аз оғози кор то 1 апрели соли 2009 963,1 ҳазор сомониро ташкил намуд,ки ин 31,8 фоизи арзиши умумии лоиҳавии иншооти мазкурро, ки 3024970 сомонӣ мебошад, ташкил менамояд.
Дар робита бо ин дар участкаҳои Ҳамадонии деҳаи Пахтабой ва Қизилюли деҳаи Ура-Ура корҳои сохтмонӣ - пармакунӣ, таҷҳизонидан, васлкунӣ ва ба истифодабарӣ омода намудани ду чоҳи об, сохтмони баъзе иншоотҳои ёрирасони пойгоҳҳои насосӣ, гузоштани ду адад трансформатори тамғаи КТП-60 ва иҷрои дигар намуди корҳо барои баровардани об аз ин ду чоҳ иҷро шуданд.
Дар сохтмони хати оби нӯшиданӣ аз деҳаи Ура-Ура то участкаи Қизилюл 1570 метр лӯлаи полиэтилении қутраш 160 мм, 1465 метр лӯлаи полиэтилении қутраш 110 мм ва 287 метр лӯларҳои оҳанини қутрашон аз 150 мм то 250 мм васл гашта, об то ҷӯйбори деҳаи Қизилюл бароварда шуд.
Инчунин дар ин деҳа барои сохтмони обанборҳо корҳои заминӣ (кандани чоҳбун- котлован) ва девор гирифтани гирду атрофи қитъаи обтаъминкунии № 1 иҷро гардиданд.
Соли ҷорӣ дар чорчӯбаи маблағҳои ҷудошуда нисбати КВД «Хоҷагии манзилию коммуналӣ» барои иншооти бузург 450 ҳазор сомонӣ ба нақша гирифта шудааст ва корҳои сохтмонӣ идома доранд.
Барои ба итмом расонидани сохтмони иншоотҳои ёрирасони системаҳо дар ин минтақа, мувофиқи ҳуҷҷатҳои таҳияшуда 1297,4 ҳазор сомонӣ маблағ лозим аст.
Дар сурати дастрас шудани маблағ иншоотҳои системаи обтаъминкунӣ дар ин ду маҳаллаи муҳоҷирони шаҳри Турсунзода сохта, ба истифода супурда мешавад.
Р. БОБОКАЛОНОВ,
директори генералии КВД «Хоҷагии манзилию коммуналӣ»-и ҷумҳурӣ
Баёни ақида (0) Санаи нашр: №: Мутолиа карданд: 3814
