маориф
Панҷ ихтисоси нав бо истифода аз технологияи инноватсионӣ
Донишкадаи технологияи инноватсионӣ ва коммуникатсионии Тоҷикистон тасмим гирифтааст, ки ҷиҳати иҷрои дастуру супоришҳои Президенти ҷумҳурӣ Эмомалӣ Раҳмон зимни мулоқот бо зиёиён дар мавриди ба забони илм ва технологияи иттилоотӣ табдил додани забони тоҷикӣ ва дар ин замина ҷорӣ намудани ихтисосҳои нав аз рӯи панҷ ихтисоси дигар мутахассис омода созад.
Бино ба иттилои Хаёл Бобоев, ректори донишкадаи мазкур, дар нишасти матбуотӣ бо ВАО ҷорӣ намудани таълими чунин ихтисосҳо-менеҷменти инноватсионӣ, информатикаи математикӣ, забоншиносӣ ва технологияи нави иттилоотӣ, таҳрир ва коркарди матн ва графикии нашри китоб, забону кишваршиносӣ ба самти фаъолияти таълимгоҳ мувофиқ буда, дар айни замон ҷомеа ба онҳо ниёз дорад. Донишкадаи технологияи инноватсионӣ ва коммуникатсионии Тоҷикистон, ки мактаби олии навбунёд буда, ҳадафи он омодасозии мутахассисони касбу пешаҳои гуногуни ба рақобати бозори меҳнат тобовар аст, чандест ба тарбияи мутахассисони соҳаи информатика, иқтисодиёти ҷаҳон, менеҷмент, системаҳои информатсионӣ ва технологӣ дар иқтисодиёт, муносибатҳои байналмилалӣ, лингвистика ва муносибатҳои байнифарҳангиву ҳуқуқи байналмилалӣ машғул аст. Дар он 1700 донишҷӯ, аз ҷумла 1230 нафар дар шӯъбаи рӯзона ва 470 нафар дар шӯъбаи ғоибона таҳсил менамояд.
Донишкада дорои заминаҳои мукаммали техникӣ буда, азм дорад бо истифода аз шабакаи интернет маркази таҳсилоти фосилавӣ ва маҳфили дӯстдорони технологияи иттилоотию коммуникатсиониро созмон диҳад.
Хайринисои Расулӣ,
«Ҷумҳурият»
Баёни ақида (0) Санаи нашр: №: Мутолиа карданд: 6123
