порлумон
БА 13 ҚОНУН ТАҒЙИРУ ИЛОВАҲО ВОРИД ГАРДИД
Дар ҷаласаи навбатии Маҷлиси намояндагони Маҷлиси Олӣ лоиҳаи ворид намудани як қатор тағйиру иловаҳо ба кодексу қонунҳои Ҷумҳурии Тоҷикистон ба тасвиб расид.
Фаъолияти мақомоти иҷозатдиҳанда ба танзим медарояд
Қодири Қосим, раиси Кумитаи давлатии сармоягузорӣ ва идораи амволи давлатӣ, зимни баррасии лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи низоми иҷозатдиҳӣ» гуфт, ки он ба мақсади такмили қонунгузорӣ дар низоми иҷозатдиҳӣ, аз ҷумла дақиқ намудани мафҳумҳо, бартараф сохтани монеаҳои маъмурӣ, ҷорӣ кардани қоидаҳои санҷишҳо, тартиб додани ҳуҷҷатҳои иҷозатномадиҳӣ, таъйини мақоми ваколатдор оид ба додани иҷозати истихроҷи канданиҳои фоиданоки пошхӯрда, мушаххасоти пардохти иҷозатдиҳӣ, таҳия ва пешниҳод шудааст. Назар ба гуфтаи мавсуф, бо қабули лоиҳа механизми назорати фаъолияти мақомоти иҷозатдиҳанда ба танзим медарояд. Мувофиқи лоиҳа Вазорати молияи Ҷумҳурии Тоҷикистон мақоми ваколатдори давлатӣ оид ба додани иҷозат барои истихроҷи канданиҳои фоиданоки пошхӯрда муайян карда мешавад.
Қабули лоиҳаи мазкур маъмурикунонии гирифтани ҳуҷҷатҳои иҷозатдиҳиро кам карда, масъулияти шахсони мансабдори мақомоти иҷозатдиҳии ҳукумати электрониро баланд мебардорад ва дар мубориза бо коррупсия мусоидат мекунад.
Тағйирот ба манфиати пасандозгузорон
Нурмуҳаммадзода Ҷамшед, раиси Бонки миллии Тоҷикистон, оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи суғуртаи пасандозҳои шахсони воқеӣ» иброз дошт, ки он ба мақсади ҳифзи ҳуқуқу манфиатҳои пасандозгузорон, зиёдшавии боварии аҳолӣ ба низоми бонкӣ, дастгирии ташкилотҳои қарздиҳӣ, рушди низоми суғуртаи пасандозҳои шахсони воқеӣ пешниҳод гардидааст. Ба гуфтаи раиси Бонки миллӣ, қариб 90 дарсади пасандозгузорон то 14 ҳазор сомонӣ пасандоз доранд. Ба мақсади ҳифзи пасандозҳои шахсони воқеӣ ва индексатсияи ҷубронпулиҳо, зиёд кардани андозаи онҳо аз 7 ҳазор сомонӣ то ба 350 нишондиҳанда барои ҳисобҳо, яъне 14 ҳазор сомонӣ пешбинӣ шуда, тағйироти дахлдор ба моддаи 22 - и қонун ворид карда мешавад.
Барасмиятдарории фарзандхонӣ осон мешавад
Саид Нуриддин, вазири маориф ва илм, зимни баррасии лоиҳаи ворид намудани тағйиру иловаҳо ба Қонуни Ҷумҳурии Тоҷикистон «Дар бораи боҷи давлатӣ» гуфт, ки он аз ҷиҳати иҷрои банди 39 - уми Нақшаи чорабиниҳо оид ба вазифаҳое, ки дар Паёми Президенти Ҷумҳурии Тоҷикистон ба Маҷлиси Олӣ, аз 26 апрели соли 2013, барои сода гардондани расмиёти фарзандхонии кӯдакони ятим омадааст, таҳия гардидааст.
Ҷиҳати иҷрои талаботи банди мазкур дар Вазорати маориф ва илм аз ҳисоби вазорату идораҳои дахлдор гурӯҳи корӣ таъсис дода шуд, ки он қонунгузориро вобаста ба масъалаҳои фарзандхонӣ мавриди омӯзиш ва таҳлил қарор дода, ба як қатор кодексу қонунҳо, аз ҷумла ба Кодекси оилаи Ҷумҳурии Тоҷикистон, Кодекси мурофиавии граждании Ҷумҳурии Тоҷикистон, «Дар бораи бақайдгирии асноди ҳолати шаҳрвандӣ» ва «Дар бораи боҷи давлатӣ» тағйиру иловаҳо пешниҳод кардааст.
Ба гуфтаи вазир, ба моддаи панҷуми қонуни мазкур тағйиру иловаҳо ворид гардида, банди 20 ба мазмуни зайл пешниҳод шудааст:
«Шаҳрвандон ҳангоми ба суд пешниҳод намудани ариза оид ба фарзандхонӣ аз додани боҷи давлатӣ озод мебошанд». Ҳамчунин калимаҳои «писархонӣ» ва «духтархонӣ» ба калимаи «фарзандхонӣ» иваз карда шуданд. Тағйироти мазкур барасмиятдарории фарзандхондиро осон намуда, дар таъмини ҳамоҳангӣ дар байни санадҳои меъёрии ҳуқуқии ин соҳа мусоидат мекунад.
Саид Нуриддин зикр кард, ки дар соли таҳсили 2014 - 2015 дар муассисаҳои таълимӣ 46218 ятим ва аз парастории волидон маҳрумгардида, аз ҷумла 2070 нафар ятими кул, ба қайд гирифта шудааст.
Мубориза бар зидди фоҳишагарӣ пурзӯр мегардад
Бахтовар Сафаров, вакили Маҷлиси намояндагон, зимни ташреҳи лоиҳаи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон гуфт, ки он ба мақсади пурзӯр намудани мубориза бар зидди фоҳишагарӣ, ки зуҳуроти нангин ба ҳисоб меравад, нигаронда шудааст. Минбаъд фоҳишаҳо дар ҳолати такрор намудани чунин кирдор ба андозаи аз 20 то 40 нишондиҳанда барои ҳисобҳо ҷарима гардида, то 15 рӯз ҳабс мешаванд. Қаблан ҷазо танҳо дар шакли ҷарима ба андозаи аз 10 то 20 нишондиҳанда барои ҳисобҳо муқаррар шуда буд.
Мунаввари САФАР, «Ҷумҳурият»
Баёни ақида (0) Санаи нашр: 17.10.2015 №: 208 Мутолиа карданд: 4894
