порлумон
АДВОКАТҲО АЗ САНҶИШ МЕГУЗАРАНД
Минбаъд адвокатҳоро Комиссияи махсуси Вазорати адлияи Ҷумҳурии Тоҷикистон аз санҷиш мегузаронад.
Ин нукта дар иҷлосияи дуюми Маҷлиси намояндагони Маҷлиси Олӣ даъвати панҷум зимни баррасии ворид намудани тағйиру иловаҳо ба Қонуни Ҷумҳурии Тоҷикистон «Дар бораи адвокатура» тасдиқ гардид.
Рустами Шоҳмурод, вазири адлия, зимни ташреҳи лоиҳаи мазкур иброз дошт, ки ба комиссияи махсус аз кормандони Вазорати адлия, Донишгоҳи миллии Тоҷикистон ва Иттиҳоди адвокатҳо шомил хоҳанд шуд. Мувофиқи тағйироти воридшуда адвокат наметавонад дар мурофиаҳо аз хешу табори худ ҳимоя намояд. Он адвокате, ки доғи судӣ дорад, яъне бо қарори суд маҳкум шудааст, дигар ҳуқуқи ҳамчун адвокат фаъолият карданро надорад. Ҳамчунин, он шахсоне, ки душаҳрвандӣ доранд, наметавонанд дар ин низом фаъолият дошта бошанд.
Ба гуфтаи вазири адлия, ҳадафи асосӣ аз ворид намудани тағйирот ба қонуни мазкур беҳтар ба роҳ мондани хизматрасонии адвокатҳо ва баланд бардоштани сатҳи тахассусии онҳост.
Бахтовар Сафаров, вакили Маҷлиси намояндагон, зимни ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон гуфт, ки тибқи он минбаъд онҳое, ки бо садои баланди техникаю таҷҳизоти сохтмонӣ шабона оромии мардумро аз соати 2300 то 600 халалдор месозанд, муҷозот мешаванд. Он нисбат ба шахсони мансабдор аз 5 то 7 нишондиҳанда ё аз 200 то 280 сомонӣ, шахсони воқеӣ аз 2 то 3 нишондиҳанда ё 80 -120 сомонӣ, шахсони ҳуқуқӣ - ширкату корхонаҳои сохтмонӣ аз 10 то 20 нишондиҳанда ё аз 400 то 800 сомонӣ муҷозоти маъмурӣ таъйин шудааст.
Дар ҳолати такрор ёфтани қонуншиканӣ барои мансабдорон 10 -15, шахсони воқеӣ 5 - 7 ва барои шахсони ҳуқуқӣ 20 - 30 нишондиҳанда барои ҳисобҳо муқаррар мегардад.
Вакилони Маҷлиси намояндагон, ҳамчунин лоиҳаи Қонуни Ҷумҳурии Тоҷикистон «Дар бораи санҷиши фаъолияти субъектҳои хоҷагидор» - ро дар таҳрири нав қабул карданд.
Мунаввари САФАР,
«Ҷумҳурият»
Баёни ақида (0) Санаи нашр: 6.11.2015 №: 222 Мутолиа карданд: 5989
