маориф
ҶАМЪБАСТИ ҲАРРӮЗАЮ ҲАФТАИНАИ ТАЪЛИМ ЗАРУР АСТ
Донишгоҳи давлатии омӯзгории Тоҷикистон ба номи Садриддин Айнӣ дар марҳилаи гузариш аз низоми анъанавӣ ба зинаи аврупоӣ - таҳсилоти бакалавр ва магистратура, ҳамчунин зинаи доктор phd қарор дорад.
Носирҷон Салимов, ректори донишгоҳ, иброз дошт, ки дар низоми нави муосир бештар вақт барои кори мустақилонаи донишҷӯён равона мешавад. Аммо раёсати донишгоҳ ҳанӯз наметавонад ин амалро ба таври дилхоҳ ва самаранок роҳандозӣ кунад. Зеро, масалан, дар самти автоматикунонии раванди таълим мушкилӣ ҷой дорад. Раёсати донишгоҳ тадбирҳои мушаххас андешида истодааст, ки ҷамъбасти ҳаррӯзаю ҳафтаинаи ҷараёни таълимро дар даст дошта бошад.
Барои амалисозии ин иқдом неруи зиёди корӣ лозим аст, - гуфт Носирҷон Салимов. – Аз ин рӯ, дар донишгоҳ таъсис ёфтани кооперативҳои фаннии дорои таҷҳизоти муосир ва китобхонаи электронӣ ба манфиати кор аст. Ҳоло донишҷӯён танҳо баъди пешниҳоди кори хаттӣ ва ба табъ расондани матолиб дар маҷаллаи навтаъсиси «Навруста» метавонанд ба дифои рисолаи дипломӣ роҳ ёбанд.
Донишгоҳ дар соли 2016 матбааи чопи китобҳоро, ки ба донишҷӯён ва устодон имкони дастрасии китобҳои арзону хушсифатро медиҳад, таъсис хоҳад дод.
Оҳистамоҳ Гулбердиева,
«Ҷумҳурият»
Баёни ақида (0) Санаи нашр: 12.01.2016 №: 7 Мутолиа карданд: 1139