туризм
ТАШРИФИ БЕСОБИҚАИ САЙЁҲОН ДАР СОЛИ 2015
Дар натиҷаи андешидани тадбирҳои муассир дар самти рушди сайёҳӣ соли 2015 нишондиҳандаҳои баландтарини воридоти сайёҳон ба кишвар сабт шуд. Агар дар соли 2014 зиёда аз 200 ҳазор сайёҳ ба ҷумҳурӣ ҷалб шуда бошад, дар соли гузашта шумораи сайёҳон ба беш аз 400 ҳазор нафар расид. Аз ин ҳисоб ба иқтисодиёти кишвар 206917000 доллари ИМА ворид гашт, ки нисбат ба соли пешин 94 дарсад зиёд мебошад.
Ин нуктаро Аҳтам Абдуллозода, раиси Кумитаи ҷавонон, варзиш ва сайёҳии назди Ҳукумати ҷумҳурӣ зимни натиҷагирӣ аз фаъолияти солонаи кумита ироа дошт.
Ба даҳгонаи давлатҳое, ки шаҳрвандонашон бештар ба кишвар ташриф оварданд, Амрико, Олмон, Федератсияи Русия, Туркия, Чин, Эрон, Қазоқистон, Қирғизистон ва Ӯзбекистон дохил гардиданд.
Бино ба иттилои раиси кумита мавзеи «Сафед - дара» мавриди навсозиву таҷдид қарор дода шуда, барои қабули шаҳрвандони дохилу хориҷ омода гаштааст. Ғайр аз ин, шурӯъ аз мавсими нави вориди сайёҳон ба кишвар, имкониятҳои пазироии шаҳрвандони хориҷӣ дар сатҳи сифатан хуб ба роҳ монда мешаванд. Дар ин самт корҳо оғоз гардида, ҳамкориҳо бо ширкатҳои сайёҳии ватанӣ тақвият ёфта истодаанд.
Инчунин, бо Қарори Ҳукумати ҷумҳурӣ аз 5 сентябри соли 2015, таҳти рақами 564 Шӯрои байниидоравӣ оид ба ҳамоҳангсозии фаъолият дар соҳаи туризм дар назди Ҳукумати мамлакат таъсис ёфт, ки он барои ҳалли мушкилоти ҷойдошта мусоидат хоҳад кард.
Ш. ҚУРБОН
Баёни ақида (0) Санаи нашр: 16.01.2016 №: 11 Мутолиа карданд: 11605
