маориф
ХАТЛОН: ДАСТОВАРД ВА МУШКИЛОТИ СОҲАИ МАОРИФ
Соли 2015 дар вилояти Хатлон 19 иншооти таълимии иборат аз 217 синфхона барои 5659 ҷойи нишаст мавриди баҳрабардорӣ қарор гирифт, ки барои сохтмони он 47 миллиону 987 ҳазору 200 сомонӣ сарф гардид. Инчунин, дар ноҳияҳои Данғара, Хуросон, Панҷ, Ёвон ва Ҷалолуддини Румӣ муассисаҳои нави таълимӣ ба фаъолият шурӯъ намуда, 14 муассисаи таҳсилоти ибтидоӣ ба муассисаҳои асосӣ, 19 муассисаи умумии асосӣ ба муассисаҳои таҳсилоти миёнаи умумӣ табдил дода шуданд.
Ҳокимхон Вализода, сардори раёсати маорифи вилояти Хатлон, бо тасдиқи ин хабар гуфт, ки айни ҳол дар вилоят 1326 муассисаи таълимӣ фаъолият дорад.
Ба гуфтаи Ҳ. Вализода, ҳайати кормандони омӯзгории муассисаҳои таълимии вилоят дар соли 2015 беҳтар гардида, айни ҳол 38153 нафар омӯзгор фаъолият намуда истодаанд.
- Аз 1728 мутахассиси ҷавони ба кор фиристодашуда 1257 нафар (72 дарсад) ба ҷойи кор ҳозир шуданд, - зикр кард сардори раёсати маорифи вилоят. - Ҳозиршавии мутахассисони ҷавон дар ноҳияҳои Фархор 54, Балҷувон 62, Панҷ 68, Восеъ 70 дарсад таъмин гардида, суст амалӣ шуда истодааст.
Дар муассисаҳои таълимии вилоят 143 омӯзгор намерасад. Дар соли 2015 бо сабабҳои гуногун дар маҷмӯъ 1912 (занон 805) нафар омӯзгорон аз кор рафтаанд.
То имрӯз 1751 омӯзгори ҷавони муассисаҳои таълимии вилоят соҳиби замини наздиҳавлигӣ, 71 нафар соҳиби замини полезӣ ва 172 нафар соҳиби қарзи боимтиёз гардидаанд.
Соли 2015 хонандагони муас-сисаҳои таҳсилоти миёнаи умумии вилоят дар олимпиадаҳои ҷумҳуриявӣ ва байналмилалӣ ба гирифтани 70 ҷойи ифтихорӣ, аз ҷумла 19 медали тилло, 13 медали нуқра ва 38 медали биринҷӣ, сазовор гардиданд.
- Аммо хонандагони муассиса-ҳои таълимии ноҳияҳои Қубодиён, Шаҳритуз, Ҷилликӯл, Восеъ, Темурмалик, Ҷалолуддини Румӣ, Панҷ, Қумсангир, Носири Хусрав, Балҷувон ва Хуросон ягон ҷойи ифтихориро дар олимпиадаҳои ҷумҳуриявӣ ва байналмилалӣ ноил нашудаанд, - изҳор кард Ҳ. Вализода.
Дар нишасти матбуотӣ ҳамчунин хабар дода шуд, ки соли таҳсили гузашта 514 (250 духтар) нафар ҷавонони лаёқатманди муассисаҳои таҳсилоти миёнаи умумии вилоят тибқи квотаи президентӣ ба муассисаҳои таҳсилоти олии касбии кишвар дохил шудаанд.
Носирҷон МАЪМУРЗОДА
Баёни ақида (0) Санаи нашр: 27.01.2016 №: 18 Мутолиа карданд: 1282