маориф
СИМОИ МАКТАБ - СИМОИ РОҲБАР
Муассисаи таълимии № 15 - и ноҳияи Восеъ сарфи назар аз он, ки дар бинои куҳна ҷойгир буда, соли 1954 сохта шудааст, дар муқоиса бо муассисаҳои дигари таълимии минтақаи шаҳри Кӯлоб шароити муносиби таълимӣ дорад.
Шиору овезаҳои девори муассисаи таълимӣ бо навиштаҷоти панду ахлоқӣ ва тозагии саҳни бино диққати моро бештар ҷалб кард. Сарфи назар аз он, ки ҳоло таътил аст, синфхонаҳо хеле покизаанд. Тозагӣ ба маънои он нест, ки гӯиё фаррошон дар кор бошанд, балки тартиби нигоҳдории мактабро роҳбарият дуруст ба роҳ мондааст. Аёниятҳои таълимии давраи шӯравӣ то ҳол дар синфхонаҳои кимиё, физика, риёзӣ, биология, адабиёт мавриди истифодаанд, дар ҳоле, ки то ба имрӯз аксари муассисаҳои таълимӣ наметавонанд синфхонаҳои лаборатории фанниро муҷаҳҳаз гардонанд. Аммо вазъ дар мактаби мазкур дигар аст. Дар майдончаи варзишии муассиса зиёда аз 10 намуди тренажёрҳо барои тамрин мавҷуданд. Мешавад таҷрибаи нигоҳдории ин мактабро ба дигарон намуна овард.
Ғулом Музаффаров, директори мактаби мазкур, иброз дошт, ки дар як сол ду маротиба бинои мактабро таъмир мекунанд. «Таъмири асосиро дар вақти таътили тобистона анҷом медиҳем. Аммо бо назардошти симои зебо доштани мактаб дар давраи таътили зимистона ҳам рангу бор мекунем. 930 хонанда дар се баст таълим мегирад ва 42 омӯзгор ба онҳо дарс медиҳад. Хонандагони мо дар соли 2015 17 медал ба даст оварданд. Айни ҳол барои синфҳои ибтидоӣ синфхона намерасад», - иброз дошт директори муассиса.
Нуриддин Саид, вазири маориф ва илм мегӯяд, ки айни ҳол сохтмони 5 синфхонаи иловагӣ барои 125 ҷойи нишаст дар назди муассисаи таълимии мазкур идома дошта, он аз ҳисоби маблағҳои марказонидашудаи Вазорати маориф ва илм сохта мешавад.
Тибқи нақша сохтмони мазкур дар ҳоли анҷомёбӣ буда, дар арафаи ҷашни Наврӯз мавриди истифода қарор мегирад. Инчунин, аз ҳисоби соҳибкорони маҳаллӣ дар назди муассисаи мазкур сохтмони толори варзиш низ идома дорад.
Ҳамчунин, дар ноҳияи Темурмалик низ сохтмони 8 синфхонаи иловагӣ дар назди муассисаи таълимии № 1 – и шаҳраки Совет барои 192 ҷойи нишаст ва бинои муассисаи таълимии № 8 барои 240 ҷойи нишаст дар деҳаи Кангурт идома дорад. Сохтмони иншооти мазкур аз ҳисоби Фонди глобалии таҳсилот маблағгузорӣ карда мешавад.
Ҳ. САНГОВА, «Ҷумҳурият»
Баёни ақида (0) Санаи нашр: 2.02.2016 №: 22 Мутолиа карданд: 1377
