фармонҳои президент
Фармони
Президенти Ҷумҳурии Тоҷикистон
Дар бораи чораҳои иловагӣ
оид ба дастгирии соҳаи кишоварзӣ
дар Ҷумҳурии Тоҷикистон
Бо мақсади таъмини рушди соҳаи кишоварзӣ, амалӣ намудани ислоҳоти минбаъдаи он ва дастгирии молиявии субъектҳои хоҷагидории соҳа фармон медиҳам:
1. Қарзи субъектҳои хоҷагидории Ҷумҳурии Тоҷикистон дар соҳаи пахтакорӣ, ки то 1 январи соли 2008 аз ҳисоби ҳамаи манбаъҳои маблағгузорӣ ба амал омадаанд, бо роҳи аз ҳисоб баровардан, кам кардан (дисконт), ба таъхир гузоштан ва тамдиди мӯҳлати пардохти қарзҳо ва барориши қоғазҳои дарозмуддати қиматноки давлатӣ ҳал карда шавад.
2. Ҳукумати Ҷумҳурии Тоҷикистон:
- дар муддати як моҳ тартиби ҳалли қарзҳои соҳаи пахтакорӣ ва Нақшаи амалиётро оид ба ислоҳоти бахши аграрӣ муайян намояд.
- дар муддати шаш моҳ Стратегияи рушди иҷтимоии деҳотро барои солҳои 2010 -2020 таҳия ва тасдиқ намояд.
3. Ҳукумати Ҷумҳурии Тоҷикистон якҷоя бо Бонки миллии Тоҷикистон:
- баргардонидани бақияи қарзи мавҷударо аз тарафи сармоягузорон таъмин намояд;
- дар муддати як моҳ сохтори дахлдорро ҷиҳати амалӣ намудани тартиби тамдиди қарзҳои соҳаи пахтакорӣ, омӯзиш ва баҳодиҳии пардохти саривақтии қарзҳои сармоягузорон, инчунин ҷараёни аз ҳисоб баровардани қарзи хоҷагиҳо созмон диҳад.
Президенти Ҷумҳурии Тоҷикистон Эмомалӣ РАҲМОН
ш. Душанбе, 30 майи соли 2009, № 663
Баёни ақида (0) Санаи нашр: №: Мутолиа карданд: 2565
