барқияҳо
Барқияи шодбошии Президенти Ҷумҳурии Тоҷикистон Эмомалӣ Раҳмон ба унвони Президенти Федератсияи Русия Дмитрий Медведев
Президенти Ҷумҳурии Тоҷикистон Эмомалӣ Раҳмон субҳи дирӯз ба унвони Президенти Федератсияи Русия Дмитрий Медведев барқияи шодбош фиристод, ки дар он аз ҷумла гуфта мешавад:
«Мӯҳтарам Дмитрий Анатолевич, дар ин лаҳзаҳои фараҳбахш Шуморо бо камоли қаноатмандӣ ба муносибати солгарди навбатии қабули Эъломияи соҳибихтиёрии давлатии мамлакататон самимона табрик менамоям.
Тоҷикистон ба сатҳи имрӯзаи ҳамкорӣ ва ҳамгироии бисёрҷонибаи мамлакатҳоямон баҳои баланд дода, азми қавӣ дорад, ки барои таҳкими ҳамаҷонибаи шарокату ҳамкории стратегии мо кӯшиш ба харҷ диҳад.
Бо камоли қаноатмандӣ зикр менамоям, ки асоси муносибатҳои Тоҷикистону Русияро анъанаҳои устувори дӯстӣ ва эҳтироми ҳамдигар ташкил медиҳанд ва онҳо ба манфиати ҳар ду давлат ва халқҳои онҳо муттасил густариш меёбанд. Ба ин мулоқоту гуфтушунидҳои ҳамешагии мо шаҳодат медиҳанд. Мо тайёрем, ки минбаъд ҳам гуфтушуниду мулоқотҳои муттасил ва эътимодбахши сиёсиро бо мақсади беш аз пеш густариш додани муносибатҳои мамлакатҳоямон дар ҳамаи соҳаҳо ривоҷ диҳем.
Дмитрий Анатолевичи мӯҳтарам, аз ин фурсати муносиб истифода бурда, ба Шумо саломатӣ ва муваффақиятҳои нав ба манфиати Русия ва ба халқи бо мо дӯсти мамлакататон сулҳу осоиш ва рӯзгори фараҳмандона орзу менамоям».
Шанбе, 13 июни соли 2009. № 76 (21 583). Соли 85-уми нашр
Баёни ақида (0) Санаи нашр: №: Мутолиа карданд: 8091
