маориф
«БАРНОМАИ ДАВЛАТӢ: МАОРИФ НАБОЯД АЗ МАСЪАЛАҲОИ ЭКОЛОГӢ ДУР БОШАД»
Мавзӯъ ва масъалае, ки О. Гулбердиева дар мақолаи «Барномаи давлатӣ: маориф набояд аз масъалаҳои экологӣ дур бошад» («Ҷумҳурият», № 234, 25.11.2015) мавриди баррасӣ ва таҳлил қарор додааст, хеле саривақтӣ ва ҷолиб мебошанд. Дарвоқеъ, имрӯз ҷаҳони мутамаддинро хатарҳои зиёди глобалӣ таҳдид мекунанд, ки яке аз онҳо зиёну фалокатҳои экологӣ ба шумор меравад. Ҳамин вазъ, мутаассифона, дар Тоҷикистон низ ба ҳар навъу шакле аз худ дарак медиҳад, ки онро нодида гирифтан аз рӯи инсоф нест.
Ба ҳамин хотир, Ҳукумати Ҷумҳурии Тоҷикистон «Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон дар давраи то соли 2020» - ро қабул карда, татбиқи онро назорат мекунад. Ин ҷо мо перомуни баъзе андешаҳои муаллифи мақола чанд нуктаро қайд кардан мехоҳем.
О. Гулбердиева менависад: «Низоми мавҷудаи тарбияи экологии аҳолӣ ва тайёр намудани кадрҳо низ ба таври кофӣ шумораи зарурии мутахассисонро таъмин карда наметавонад ва воқеан, дар ҳамаи соҳаҳои илм, табиатшиносӣ, хоҷагии ҷангал, соҳаи ҳифзи муҳити зист нарасидани мутахассисони баландихтисос ба назар мерасад. Муҷаҳҳазсозии нокифояи моддию техникии муассисаҳои таълимӣ, усулҳои номукаммали таълим, набудани шабакаи иттилоотӣ ба сифати таълим таъсири манфӣ мерасонанд».
Бо камоли эҳтиром ба таваҷҷуҳи муаллиф О. Гулбердиева мерасонем, ки то Истиқлолияти давлатии кишвари азизамон дар хусуси тарбияи экологӣ ва омӯзиши доманадору бавусъати он амали муассиру мондагоре ба роҳ монда нашуда буд. Маҳз баъд аз ба даст овардани истиқлолияти комил дар тамоми донишкадаю донишгоҳҳои олӣ, коллеҷу литсейҳо, муассисаҳои такмили ихтисоси кормандони соҳаи маориф таълими фанни «Экология» мунтазам роҳандозӣ гардид. Аз ҷумла, дар макотиби олӣ соле 32 соат дар ҳамаи факултаҳо ин фан омӯзонида мешавад. Ҳамчунин, дар мактабҳои таҳсилоти миёнаи умумӣ аз соли 2007 фанни «Экология» мавриди омӯзиши мактабиён қарор гирифтааст. Ҳадафи ниҳоӣ аз ҷорӣ намудани фанни мазкур ошноии бештару огоҳмандона аз вазъи муҳити зист, баланд бардоштани фарҳангу маърифати экологии насли наврас, ҳифзи боигариҳои табиат ва тозаву пок нигоҳ доштани гирду атроф мебошад.
Вазорати маориф ва илми ҷумҳурӣ тамоми чораҳоро дар раванди таълими судмандтари фанни «Экология» андешида истодааст.
Дафтари матбуотии Вазорати маориф ва илм
Баёни ақида (0) Санаи нашр: 20.04.2016 №: 76 Мутолиа карданд: 1582
