президент
Сафари Сардори давлат ба ноҳияи Данғара
Президенти Ҷумҳурии Тоҷикистон Эмомалӣ Раҳмон баҳри иштирок дар машварати ҷумҳуриявӣ дар бораи гузаронидани кишти тирамоҳии зироатҳои кишоварзӣ ба ноҳияи Данғараи вилояти Хатлон сафари корӣ анҷом дод.
Сардори давлат Эмомалӣ Раҳмон қабл аз оғози қисмати назариявии машварат нахуст ба заминҳои Кооперативи истеҳсолии «Сомонҷон», ки дар ҳудуди деҳоти Лолазори ноҳияи Данғара қарор дорад, ташриф оварда, бо корҳои намунавии деҳқонони хоҷагии пешқадам аз наздик шинос шуд.
Дар яке аз қитъаҳои замини хоҷагии мазкур Президенти Ҷумҳурии Тоҷикистон Эмомалӣ Раҳмон бо дуою фотиҳаи накӯ ба кишти тирамоҳии гандуми тухмӣ дар замини обӣ оғоз бахшида, дастур дод, ки гандуми тирамоҳии тухмӣ дар 500 гектар заминҳои обии ин кооператив кишт карда шавад. Ба гуфти ӯ, агар ҳар гектар камаш 40-сентнерӣ ҳосил диҳад, 2000 тонна гандуми тухмӣ ба даст меояд, ки барои эҳтиёҷоти минтақаи Кӯлоби вилояти Хатлон басанда аст.
Зикр гардид, ки аҳли ин хоҷагӣ бо олимони Академияи илмҳои кишоварзии Тоҷикистон ҳамкории босамар ба роҳ монда, ба натиҷаҳои баланд сазовор гаштаанд.
Кооператив 180 нафар аъзо дорад, ки онҳо бо маош ва шароити хуби меҳнатӣ таъминанд, дар майдони 300 гектар боғу токзори нав бунёд, дар 17 гектар картошка, 3 гектар пиёз ва дар заминҳои боқӣ навъҳои дигари сабзавот кишт шудаанд.
Кишти такрории заминҳо дар хоҷагӣ хеле хуб ба роҳ монда шудааст, ки намунаи ибратбахши иҷрои муроҷиатномаи Президенти Ҷумҳурии Тоҷикистон Эмомалӣ Раҳмон баҳри истифодаи пурсамар аз ҳар ваҷаб замини корам ва зиёд намудани истеҳсоли маҳсулоти кишоварзӣ дар дохили кишвар аст. Замини байни қаторҳои боғи навбунёд низ дар ин ҷо босамар истифода мешавад. Аз ҳар гектари қитъаи 17 -гектараи он деҳқонон 120-сентнерӣ картошкаи барвақтӣ ба даст овардаанд.
Сардори давлат Эмомалӣ Раҳмон дар бошишгоҳи саҳроии ҳамин хоҷагӣ бо роҳбарият ва масъулони соҳаи кишоварзии шаҳру ноҳияҳои вилояти Хатлон доир ба ташкили дурусти кишти тирамоҳии зироатҳо машварати корӣ доир намуд, ки дар он ҳамчунин масъулини Ҳукумати Ҷумҳурии Тоҷикистон ва роҳбарони вазорату идораҳои дахлдори ҷумҳуриявӣ низ иштирок намуданд.
Ба онҳо баҳри вусъат додани кишти тирамоҳии ғалладона ва сабзавоти барвақтӣ барои баҳори соли оянда, истифодаи пурсамар аз заминҳои корам, риояи дурусти қоидаҳои агротехникии коркарди замин ва дар маҷмӯъ афзоиш додани истеҳсоли маводи ғизоии ватанӣ ва таъмин намудани амнияти озуқавории кишвар дастуру супоришҳои қатъӣ дода шуд.
Дар машварат ҳамчунин ҳисоботи раиси вилояти Хатлон Ғайбулло Авзал ва раисони як қатор ноҳияҳо шунида шуд.
Президенти мамлакат Эмомалӣ Раҳмон аз қонуншиканиҳои зиёд дар тақсимоти замин дар ноҳияи Восеи вилояти Хатлон изҳори нигаронӣ карда, ба роҳбарияти вилояту ноҳия ва мақомоти дахлдори ҳифзи ҳуқуқ дастур дод, ки баҳри ислоҳи вазъи бамиёномада чораҳои қатъӣ андешанд.
Маслиҳату ҳидоятҳои судманди худро дар машварат ҳамчунин директори Институти зироаткории Академияи илмҳои кишоварзии Тоҷикистон Саидҷамол Саидов, директори Институти боғпарварии академия Турсунбой Аҳмадов, олими соҳа Анвар Ҷалилов ва роҳбарони чанд хоҷагии намунавии ноҳияҳои Данғара, Восеъ ва Бохтар баён намуданд.
Таҷрибаи кишоварзии роҳбари хоҷагии инфиродии ноҳияи Бохтар Ҳоҷиюнусалӣ Қӯшоқов басо ибратбахш маънидод гардид.
Дар охир Сардори давлат Эмомалӣ Раҳмон дар назди иштирокчиёни машварат суханронӣ намуда, оид ба бӯҳрони иқтисодию молиявии ҷаҳонӣ ва коста гаштани амнияти глобалии озуқаворӣ, роҳҳои пешгирӣ аз таъсири бади он ба бозори истеъмолии Тоҷикистон андешаҳои ҷолиб баён намуд.
Президенти Ҷумҳурии Тоҷикистон қатъиян дастур дод, ки майдони кишти такрорӣ дар соли оянда ба 160 ҳазор гектар расонда шавад ва изҳор дошт, ки ин нисбат ба соли равон 60 ҳазор гектар зиёд аст.
Изҳори қаноатмандӣ шуд, ки имсол тавассути истифодаи босамари заминҳо ва зиёд намудани истеҳсоли ғалладона қиматшавии босуръати орду гандум натанҳо боздошта шуд, балки нархи он то андозае паст гардид.
Ба олимону мутахассисони соҳаи кишоварзӣ дастур дода шуд, ки баҳри дар амал татбиқ намудани таҷрибаҳои пешқадами илму техника дар истифодаи босамари заминҳои корам ва ба даст овардани ҳосили фаровон бо деҳқонону хоҷагидорон дар робитаи доимӣ бошанд ва ба мардум тарзи дурусти корро ҳамчунин аз тариқи телевизион ва дигар воситаҳои ахбори омма фаҳмонанд.
Баёни ақида (0) Санаи нашр: №: Мутолиа карданд: 4211
