маориф
ДДТ. МАРКАЗИ РУШДИ КАСБИЯТ ТАЪСИС ЁФТ
Ҷиҳати баланд бардоштани сифати таълиму тарбияи мутахассисони замони нав дар назди Донишгоҳи технологии Тоҷикистон Маркази рушди касбият ва мониторинги рақобатпазирии донишҷӯён дар бозори меҳнат таъсис дода шуд.
Ин матлабро Нуралӣ Шоҳиён, ректори донишгоҳ, дар Конфронси илмӣ – амалии ҷумҳуриявӣ таҳти унвони «Ҳадаф, моҳият ва вазифаҳои марказҳои рушди касбият (карера) дар муассисаҳои таҳсилоти олии касбии Ҷумҳурии Тоҷикистон» баён дошт.
Н. Шоҳиён гуфт, ки марказ фаъолияти худро дар доираи амалигардонии лоиҳаи UNIWORK - и Иттиҳоди Аврупо ва бо ҳамдастии шарикони ватании лоиҳа: Вазорати маориф ва илм ва Донишкадаи политехникии Донишгоҳи техникии Тоҷикистон ба номи академик М. Осимӣ дар шаҳри Хуҷанд ба роҳ мондааст. Ташкили марказ дар самти фаъолияти инноватсионии муассисаи таълимӣ, мутобиқгардонии он ба фазои ягонаи таълимоти ҷаҳонӣ, пайдо намудани роҳҳои баландбардории сатҳи рақобатпазирии донишҷӯёну хатмкунандагон, бо кор таъмин кардани онҳо, баланд бардоштани эътибори донишгоҳ нақши созгор хоҳад бозид.
Сафарбой Самадов, намояндаи Вазорати маориф ва илм, иброз дошт, ки мутахассисонро на танҳо барои бозори меҳнати дохилӣ, балки бозори хориҷ низ омода бояд сохт. Бинобар ин, таъсиси чунин марказҳо дар донишгоҳҳо амри воқеист.
Александр Синелобов, директори тиҷоратии ҶДММ «Таком» (Beeline), дар самти дурнамои ҳамкориҳои ин ниҳод бо ДТТ дар раванди амалисозии ҳадафҳои Маркази рушди касбияти Донишгоҳи технологӣ сухан ронда, иброз дошт, ки ширкат ҷиҳати густариши ҳамкориҳо бо Донишгоҳи технологӣ созишномаи ҳамкорӣ ба имзо расонд, ки он аз се лоиҳаи калидӣ иборат аст: дастгирии навоварони ҷавон, таъмини таҷрибаомӯзии донишҷӯён, ташкили системаи дастрасӣ ба интернети босифати WIFI.
Ҳамчунин, дар доираи чорабинӣ дар ҳамкорӣ бо вазоратҳои саноат ва технологияҳои нав, меҳнат муҳоҷират ва шуғли аҳолӣ, Палатаи савдо ва саноат ва дигар ташкилоту ширкатҳои ватанӣ ярмаркаи ҷойҳои кории холӣ ва намоиш – фурӯши молу маҳсулоти ширкату корхонаҳои ватанӣ баргузор гардид. Мақсади чорабинӣ ҳарчи бештар наздик намудани фаъолияти ташкилоту корхонаҳо ва бизнес сохторҳо бо муассисаҳои таҳсилоти олии касбӣ ва ҳамоҳанг сохтани барномаҳои таълимии касбӣ ба талаботи тахассусии корфармоён дар шароити рақобат дар бозори озоди меҳнат мебошад.
Ш. ҚУРБОН, «Ҷумҳурият»
Баёни ақида (0) Санаи нашр: 29.04.2016 №: 83 Мутолиа карданд: 1279
