номаҳо
ҲАННОТОН
Дружинаҳои халқӣ дар пешгирии амали онҳо нақш гузошта метавонанд
Шумораи бозорҳо дар кишвар ба маротиб афзудааст. Вале агар кас дар бозор рафтору кирдори тоҷирони навбаромадро мушоҳида кунад, ҳайрон мемонад. Кори онҳо асосан ҳаннотист. Маҳз ҳаннотон, низоми тартиботи бозорро вайрон мекунанд, хариду фурӯшро зери назорат гирифта, имкон намедиҳанд, ки марди деҳқон дастранҷашро ба бозор дарорад. Вақте ки деҳқон бозор меояд, ҳаннотон ӯро дар роҳ иҳота карда, борашро ба бозор даровардан намемонанд, маҳсулоташро нисбат ба нархи бозор чанд маротиба арзон мехаранд ва худ вориди бозор месозанд, ки ин боиси коҳиш наёфтани нархи маҳсулот шудааст. Ҳолатҳое низ ҳастанд, ки баъзе аз тоҷирони беинсоф ба арзон харидани дастранҷи марди деҳқон қонеъ нагардида, мекӯшанд аз тарозу ҳам ҳақ бизананд.
Ман дар техникуми омори шаҳри Ваҳдат қариб 50 сол ҳамчун омӯзгор фаъолият доштам. Он солҳо дружиначиёни халқӣ кор мекарданд, ки сардорашон будам. Аз ҳисоби ашхоси гуногун 8 нафар аъзои дружина баробари мақомоти ҳифзи ҳуқуқ дар риояи тартиботи ҷамъиятӣ саҳм мегузоштем, бо авбошону ҳаннотон муборизаи беамон мебурдем. Мутаассифона, ҳоло чунин созмонҳои ҷамъиятӣ, ки фаъолияташон шоистаи таҳсин аст, вуҷуд надоранд.
Дар бозорҳои шаҳр давр зада табъам хира мегардад. Вазъи санитарӣ ҷавобгӯи талабот нест. Тоҷирон бе ҳуҷҷатҳои зарурӣ, аз ҷумла сертификати сифат ва мол дар ҷойҳои ифлос машғули коранд. Ҳамаи инро дида хоҳони онам, ки дружиначиёни халқӣ аз нав эҳё гарданд ва пеши роҳи чунин нобасомониҳоро гиранд.
Ҷумҳур Ҷаъфарзодаи Самарқандӣ,
собиқадори меҳнат
Баёни ақида (0) Санаи нашр: 30.04.2016 №: 84 Мутолиа карданд: 10150
