номаҳо
МАКТАБ МУҚАДДАС АСТ, ВАЛЕ...
Мусаллам аст, ки мактаб барои хонандагону толибилмон макони муқаддас маҳсуб меёбад. Дар ин даргоҳи илму маърифат онҳо аз омӯзгорон дарси ҳаёту наҷот меомӯзанд. Ба ин хотир мақоми омӯзгорро бузургони мо дар асрҳои пешин низ бартар аз падар меҳисобиданд. Яъне ҳар шогирд вазифадор аст, ки ба мактабу омӯзгор эҳтироми махсус дошта бошад. Аксар омӯзгорон рисолати инсонӣ ва касбии худро хуб медонанду иҷро мекунанд. Аз ин рӯ, дар миёни шогирдону волидон маҳбубанд. Мутаассифона, на ҳамаи онҳо ин рисолатро хуб дарк намудаанду шинохтаанд. Дар ин сурат аст, ки мо – хонандагон баъзан аз мактабу муаллим дилхаста мегардем. Барои чӣ? Барои он ки онҳо, яъне баъзе омӯзгорон дар ин макони муқаддас ба мо суханҳои қабеҳ мегӯянд. Албатта, сухан на дар бораи ҳамаи онҳост.
Табиист, ки агар фарзандон суханони қабеҳ бигӯянд, яъне дашном бидиҳанд, ҳатман волидайн барои тарбияи дурусти онҳо сарзанишашон мекунанд. Бо таъкид иброз медоранд, ки ин амали баду нангин асту обрӯи одамиро мерезад. Хушбахтона, мо ин масъаларо хуб дарк мекунем ва ҳеҷ гоҳ, ҳатто дар ҳолати ғазаб касеро таҳқир наменамоем, дашном намедиҳем.
Ҷойи тааҷҷубу нороҳатӣ он аст, ки муаллим, омӯзгор, ки бояд барои мо намунаи ибрат бошад, дашном медиҳад. Таҳаммули он, албатта, бисёр душвор аст.
Ба мактаб барои иштирок дар маҷлисҳо падару модарон даъват мешаванд. Ба онҳо омӯзгорон хосса аз қубҳи таҳсил ва ахлоқи бади хонандагон мегӯянд. Мақсад ин таваҷҷуҳи бештар додан ба тарбияи мо аст. Вале муносибати омӯзгоронро нисбат ба мо кӣ мепурсад?
Шумо бо тааҷҷуб фаҳмидан мехоҳед, ки сухан дар бораи кӣ меравад? Мегӯем, вале на ин бор, зеро эътимод дорем, ки баъди нашри матлаб омӯзгорон муносибати худро тағйир хоҳанд дод. Онҳо дигар суханҳои қабеҳеро чун - «Бар падарат…, лаънатӣ, падар…, нинармальный, дафъ шав, шуматон мебинам» ба забон нахоҳанд гирифт. Мегӯянд, ки ояндаи кишвар дар дасти мо - ҷавонон аст. Бо чунин роҳнамоён мо то ба куҷо мерасем ва чӣ тавр?
Ориёна ва Омирона ДОСТИЕВАҲО,
хонандагони синфи 10 «г»-и
мактаби таҳсилоти миёнаи умумии
№ 72 - и шаҳри Душанбе
Баёни ақида (0) Санаи нашр: 4.05.2016 №: 85 Мутолиа карданд: 11085
