номаҳо
ЧОР СОЛ БОЗ ИНТИЗОРАМ
Панҷ гектар замин доштам. Аз он самаранок истифода мебурдам. Қарори раиси ноҳияро низ аз соли 2003 доштам. А № 016889 серия ва рақами сертификати ҳуқуқи истифодаи заминам буд. Аз он замон то ин ҷониб барои 5 гектар замин андоз месупорам.
Алҳол ин замин, яъне замини хоҷагии деҳқонии Чойлов 3,6 гектарро ташкил медиҳад. Дар 1,4 гектар замини хоҷагиям чор оила хонаҳои муваққатӣ сохтаанд. Гап дар сари он аст, ки кормандони заминсозии Ҷамоати деҳоти Озодӣ (ҳоло Ҳасан- Ҳусейн), бе огоҳӣ ва ризояти мо барои гирифтани ин замин протокол тартиб дода, барои расмӣ шудан имзоҳои худро гузоштаанд. Чор сол пештар, яъне соли 2012 кормандони кумитаи идораи замини ноҳияи Ёвон омада, ба ман гуфтанд, ки замини шумо чун қитъаҳои наздиҳавлигӣ тақсим шуд. Ҳарчанд хостам, ки оид ба ин амал, агар қонунӣ бошад, ҳуҷҷате ба ман бидиҳанд, надоданд. Ҳатто таъкид доштанд, ки барои шумо ягон ҳуҷҷат намедиҳем.
Ба мақомотҳои дахлдор оид ба ин масъала муроҷиат намудам, аммо он то ба ҳанӯз ҳал нашуда монд. Зарур шумурдам, ки дар ин хусус бо номаи имдод ба гӯшаи «Шаҳрванд»-и рӯзномаи «Ҷумҳурият» муроҷиат бикунам. Охир чор сол боз на ба додам мерасанд, на ҳуҷҷати тасдиқкунандае медиҳанд ва на аз супурдани андоз барои 5 гектар озодам мекунанд.
Мирзоалӣ РАҲМОНОВ,
деҳаи Охҷари ноҳияи Ёвон
Баёни ақида (0) Санаи нашр: 9.05.2016 №: 89 Мутолиа карданд: 10954
