маориф
ФАРХОР. 80 ДАРСАД ДОВТАЛАБИ МАЪЛУМОТИ ОЛИАНД
Соли сеюм аст, ки дар мактабҳои олӣ ва коллеҷҳои Тоҷикистон низоми нави қабули довталабон тариқи Маркази миллии тестӣ ҷорӣ гардидааст. Ин раванд шаффофияти қабули довталабонро ба донишгоҳу донишкадаҳо таъмин менамояд. Дар ноҳияи Фархор барои ташкил ва гузаронидани имтиҳоноти дохилшавӣ тамоми шароит фароҳам оварда шудааст. Натиҷаи ҳамин кӯшишҳост, ки довталабони ноҳия ба натиҷаҳои хуб ноил мешаванд.
Аз ҷумла, соли 2015 дар маъракаи қабули довталабон аз муассисаҳои таҳсилоти миёнаи умумии ноҳияи Фархор тавассути Маркази миллии тестӣ 2518 нафар ба донишгоҳу донишкадаҳои олии касбӣ ҳуҷҷат супориданд, ки 1515 нафар ба муассисаҳо қабул гардиданд. Аз ин шумор 20 нафар тибқи квота ва 74 нафар тавассути Маркази барномаҳои байналмилалӣ дар муассисаҳои таҳсилоти олии касбии дигар давлатҳо ба таҳсил ҷалб карда шуданд. Ба ғайр аз ин, 386 нафар ба коллеҷҳо ва 276 нафар ба литсейҳои касбӣ - техникӣ қабул гардиданд.
Шаффофияти раванди дохилшавӣ тавассути маркзи тестӣ ба хонандагон эътимод бахшид. Зеро онҳо боварии амиқ ҳосил намуданд, ки метавонанд бо ин роҳ ба макотиби олӣ бе мамоният дохил шаванд. Аз ин рӯ, соли ҷорӣ аз байни 2611 хатмкунанда 2110 нафар ба Маркази миллии тестӣ ҳуҷҷат супоридаанд, ки 80 дарсади шумораи умумии хатмкунандагонро дар бар мегирад.
Вобаста ба ин масъала Ғазалшо Сафарзода, мудири шуъбаи маорифи ноҳия, зикр намуд, ки хатмкунандагон ҳамасола дар маъракаи ҳуҷҷатсупорӣ фаъоланд, зеро ҳамаи мактабҳои ноҳия бо технологияи муосири иттилоотӣ муҷаҳҳаз гардонда шудаанд. Ин амал сатҳи донишандӯзиро ба таври назаррас баланд бардошт. Аз ҳама муҳимаш он аст, ки хонандагон дар ҳуҷҷатсупорӣ ва аз қайди ин марказ гузаштан ҳеҷ душворӣ намекашанд.
Лола РИЗОЕВА, «Ҷумҳурият»
Баёни ақида (0) Санаи нашр: 14.05.2016 №: 92 Мутолиа карданд: 1904
