суханрониҳо
Суханронии Эмомалӣ Раҳмон, Президенти Ҷумҳурии Тоҷикистон, дар маросими рӯнамоии китоби «Тоҷикон дар оинаи таърих», Кувайт, 16 майи соли 2016
Муҳтарам устодон ва донишҷӯёни Донишгоҳи давлатии Кувайт!
Ҳозирони гиромӣ!
Бароям мояи ифтихору сарфарозист, ки ҳамчун муаллиф дар маҳфили имрӯза ба ифтихори рӯнамоии китоби тозанашри «Тоҷикон дар оинаи таърих» ширкат дорам. Нашри нави ин китоб ба забони арабӣ дар кишвари шумо нишонаи эҳтиром ва эътирофи миллатест, ки бо таърихи куҳан ва фарҳанги асили худ дар пешрафти тамаддуни башариву исломӣ саҳми шоиста гузоштааст.
Тавре дар муқаддимаи китоб зикр шудааст, тоҷикон яке аз қадимтарин мардумони минтақаи Осиёи Марказӣ буда, собиқаи беназири тамаддунсозӣ ва анъанаву таҷрибаи ғании давлатдории онҳо мавриди таваҷҷуҳ ва омӯзиши амиқи олимону муҳаққиқони ҷаҳон қарор гирифтааст.
Китоби «Тоҷикон дар оинаи таърих» дар даврае таълиф шуд, ки мардуми тоҷик аз оғози даврони соҳибистиқлолӣ ба эҳёи анъанаву таҷрибаи таърихӣ ба хотири бунёди давлати миллӣ ниёз доштанд, то ин ки бо мадади рӯҳи ниёгони бузург барои наслҳои худ фардои дурахшонро фароҳам созанд.
Имрӯзҳо Тоҷикистон ба ҷашни 25 - солагии Истиқлолияти давлатии худ омодагӣ мегирад. Яъне мо имсол чоряк асри аввали таърихи навини кишварамонро дар шоҳроҳи бунёди давлати соҳибихтиёр ҷамъбаст мекунем. Ҳоло кишвари мо бо азму иродаи қавӣ ва мақсаду мароми нек дар фазои сулҳу субот ва ваҳдати миллӣ ба сӯи ояндаи умедбахш қадамҳои устувор гузошта истодааст. Дар ин ҷода мардуми тоҷик аз дастовардҳои имрӯзаи мардуми Кувайт ва дигар миллатҳои дӯсту бародар низ илҳом мегирад.
Беҳуда нест, ки ҳанӯз 21 сол муқаддам, дар ибтидои Истиқлолияти давлатии Тоҷикистон, моҳи апрели соли 1995 нахустин сафари расмии ман ба давлатҳои араб маҳз аз Кувайт шурӯъ шуда буд. Таҷрибаи давлати шумо дар эъмори ҷомеаи намунавӣ ва ободонии кишвар, таъмини рушди устувори иқтисодиву иҷтимоӣ ва таъмини оромиву осудаҳолии ҳар фарди ҷомеа ҷолибу омӯзанда эътироф шудааст.
Он замон бародари азиз, амири Давлати Кувайт шайх Сабоҳ ал-Аҳмад ал-Ҷобир ас - Сабоҳ дар мақоми муовини аввали сарвазир ва вазири корҳои хориҷӣ фаъолият доштанд. Дӯстии мо бо ин марди хирадманд ва сиёсатмадори рӯзгордида аз ҳамон айём оғоз гардида, дидорҳои мунтазами мо ба рушду тавсеаи робитаҳои дӯстона ва ҳамкориҳои судманди кишварҳоямон нигаронида шудаанд.
Сафари расмии кунунии ин ҷониб ба кишвари афсонавии шумо идомаи ҳамон мулоқотҳои арзишманд аст. Доир гардидани маҳфили имрӯза дар Донишгоҳи давлатии Кувайт бо ҳузури донишҷӯён ва устодони донишгоҳ басо рамзӣ мебошад. Ба ин манзур қобили зикр аст, ки дар Тоҷикистон ҳазорон нафар донандагони хуби забони арабиро метавон номбар кард, ки даҳҳо нафари онҳо дар риштаҳои гуногуни забону адабиёт ва таъриху фарҳанги арабӣ рисолаҳои илмӣ дифоъ кардаанд.
Изҳори умед мекунем, ки аз байни шумо, ҷавонон, низ олимону муҳаққиқоне ба воя мерасанд, ки таърихи дерина ва фарҳанги ғановатманди тоҷиконро мавриди таҳқиқу омӯзиш қарор медиҳанд. Забону адабиёт ва таъриху фарҳанги тоҷикон дар ҷаҳони араб то ҳол ба андозаи зарурӣ омӯхта нашудааст. Бисёр мехостем, ки муҳаққиқони кувайтӣ, бо дарназардошти муносибатҳои неки дуҷониба, дар ин ҷода нисбат ба дигар бародарони араби худ пешқадам бошанд.
То ин дам, то ҷое огоҳам, дар ин ҷода ҳамагӣ осори шоираи муқтадири кувайтӣ шайха Суод ас-Сабоҳ ба тоҷикӣ тарҷума ва дар Душанбе нашр шуда, ашъори ду шоири халқии Тоҷикистон Гулрухсор ва Гулназар дар Кувайт дар шакли китоб ба табъ расидааст.
Фикр мекунам, ки Шӯрои миллии фарҳанг, ҳунар ва адабиёти Кувайт бо истифода аз имкониятҳои мавҷуда ва таваҷҷуҳи муштарак ҳамкории худро бо Сафорати Ҷумҳурии Тоҷикистон дар бахши тарҷума ва табъу нашри осори мардумонамон идома хоҳад дод.
Дар фарҷоми сухан мехоҳам ба созмондиҳандагони ин маҳфил, аз ҷумла ба роҳбарияти Донишгоҳи давлатии Кувайт ва, албатта, Шӯрои миллии фарҳанг, ҳунар ва адабиёт, хусусан, мудири кулли он ҷаноби Алӣ Ювҳа самимона арзи сипос ва қадрдонӣ намоям.
Итминон дорам, ки ин чорабинии бахшида ба 25 - солагии Истиқлолияти давлатии Тоҷикистон, бузургдошти дар соли ҷорӣ пойтахти фарҳанги исломӣ эълон шудани шаҳри Кувайт ва сафари расмии мо сароғози корҳои нек дар самти ошноии ҳар чи бештари ду миллати бародар бо таъриху фарҳанги якдигар хоҳад гардид.
Саломату комёб бошед! Ташаккур!
Баёни ақида (0) Санаи нашр: 18.05.2016 №: 94 Мутолиа карданд: 1611
