номаҳо
ПИСАРАМ. МАРО АЗ ҶАБРИ Ӯ ХАЛОС КУНЕД
Ман Ҷӯраев Шарофбой, аз соли 1976 бо шаҳрванд Ҷӯраева Бишарифа оила барпо намуда, то соли 2012 якҷоя зиндагӣ карда, соҳиби 4 фарзанд шудаем. Ҳамаи фарзандонро кор карда ба воя расонидаам.
Баъди 36 сол зиндагӣ карданам бо сабаби маъюб буданам ҳамсарам аз ман ҷудо шуд. Фарзандонам низ аз ман рӯй гардонидаанд. Айни ҳол, маҷрӯҳи гурӯҳи 2 - юм буда, ҳамагӣ бо маблағи нафақа рӯз мебарам.
Писари калониам Ҷӯраев Раҳимбой маро азоб дода намехоҳад, ки дар манзили истиқоматиам зиндагӣ кунам. Ман дар шиканҷаи хонаводагӣ қарор дорам. Писарам Ҷӯраев Рамзилло доимо маро лату кӯб мекунад. Борҳо хостам аз ташхиси суди тиббӣ гузарам, аммо «фарзандат» гуфта, хулосаи ташхисро пешниҳод накардаанд.
Баъди задани писарам Рамзилло то ҳоло дилам дард мекунад. Ҳангоми муроҷиат карданам ба духтури дил, гуфт ва қайд кард, ки дил осеб гирифтааст.
Борҳо ба мақомотҳои дахлдор муроҷиат кардам, аммо ягон мақомот ба ман кумак кардан намехоҳад.
Ҳамсарам бо фарзандонам ҳамзабон шуда, бидуни розигии ман ҳамаи ашёи маро фурӯхта бегона кардаанд. Ман ноилоҷ дар таги дарвоза, дар анборхона зиндагӣ мекунам.
Қайд кардан зарур аст, ки бо сабаби зери шиканҷа қарор доштанам, ба фишори хун, фалаҷи тарафи чап гирифтор шудаам. Фарзандонам ва оилаам намехоҳанд, ки дар ин хона зиндагӣ кунам. Ба тариқи маҷбурӣ маро мехоҳанд дар Диспансери касалиҳои рӯҳу асаб бистарӣ карда, хонаи истиқоматиамро фурӯшанд.
Хоҳиш маро аз ҷабри фарзандон халос намоед.
Шарофбой ҶӮРАЕВ,
шаҳри Исфара, кӯчаи Самадов, 22
Баёни ақида (0) Санаи нашр: 19.05.2016 №: 95 Мутолиа карданд: 11223
