маориф
ҚАДАМИ НАХУСТИН БА СӮИ ОРЗУҲО
Ҳафтаи дуюм аст, ки дар 43 маркази 15 шаҳру навоҳии ҷумҳурӣ аз рӯйи қисми А, кластери 1, 2 (гурӯҳи ихтисосҳои забон, таърих, асосҳои давлат ва ҳуқуқ, математика ва дигар тахассусҳо) имтиҳонҳои марказонидашудаи дохилшавӣ ба мактаби олӣ ва коллеҷҳо идома доранд. Рӯйхати марказҳои имтиҳонӣ дар сомонаи расмии Маркази миллии тестии назди Президенти Ҷумҳурии Тоҷикистон гузошта шудааст.
Дар вилояти Суғд дар шаҳрҳои Истаравшан, Конибодом, Панҷакент, ноҳияи Бобоҷон Ғафуров, дар шаҳрҳои Кӯлоб, Қӯрғонтеппа, Хоруғ, ноҳияҳои Данғара, Шаҳритуз ва Рашт, инчунин дар чор ноҳияи шаҳри Душанбе марказҳои имтиҳонӣ барои довталабон дарҳои худро боз карданд.
Ёвари директори Маркази миллии тестӣ Абдувосит Юлдошев ба мо иттилоъ дод, ки барои дохил шудан ба макотиби олӣ ва муассисаҳои таҳсилоти касбии ҷумҳурӣ ба марказҳои азқайдгузарӣ 83 590 нафар ҳуҷҷат супоридаанд. Ин шумора нисбат ба соли гузашта 10 590 нафар зиёд аст. Онҳо барои 53 000 ҷой мубориза мебаранд.
Хотиррасон бояд кард, ки имтиҳонҳои қисми А ва Б барои довталабон ҳатмӣ буда, алҳол онҳо аз рӯи қисми Б имтиҳон супорида истодаанд. Мо аз се маркази имтиҳонӣ, ки дар мактабҳои рақамҳои 94 ва 25 - и ноҳияи Сино, 71 - и ноҳияи Шоҳмансур ҷойгиранд, дидан кардем. Ҷараёни баргузории имтиҳонҳо шафоф буда, волидон тавассути мониторингҳо дар толори васеи муассисаҳои мазкур рафти имтиҳонҳоро мушоҳида менамоянд.
Ҷавоби имтиҳонҳоро дар сомонаи ММТ метавон пайдо кард. Натиҷаҳои ниҳоӣ бошад, рӯзи 25 июл дар худи марказ эълон карда мешавад. Довталабоне, ки холҳои заруриро гирифтаанд, бо паёмакҳои марказ барои иштирок дар озмуни минбаъда барои тақсимот ба мактабҳои олӣ ва миёнаи махсус даъват карда мешаванд.
Убайдулло РАҲИМОВ
Баёни ақида (0) Санаи нашр: 13.07.2016 №: 136 Мутолиа карданд: 4983
