маориф
МУСОИДАТ ХОҲЕМ КАРД
«Забономӯзӣ. Набояд раванди онро беназорат монд», «Ҷумҳурият», № 115, аз 15 июни соли 2016
Рӯзномаи «Ҷумҳурият» дар матлаби «Забономӯзӣ. Набояд раванди онро беназорат монд» сабабҳои хуб набудани раванди омӯзишро баррасӣ кардааст. Муаллиф бо ишора ба чандин муассисаҳои таълимии кишвар аз қонеъкунанда набудани раванди омӯзишу таълими забони русӣ ва англисӣ изҳори нигаронӣ намудааст. Бояд бигӯем, ки феълан бо сабаби нарасидани мутахассиси варзидаи касбӣ вазъи таълиму тадрис ва сатҳу сифати дониши шогирдон, бахусус дар деҳот, хеле ташвишовар аст.
Дар як фосилаи кӯтоҳ ин қадар мутахассисони варзидаи забонҳои хориҷӣ, тарҷумонҳои сатҳи байналмилалӣ, коршиносону кормандони сафоратхонаю корпусҳои дипломатӣ, тоҷирону муҳандисон, иқтисоддонону сиёсатмадорон тарбия ёфта, ба камол расидаанд, ки ҳама маҳсули заҳмати устодони донишгоҳу донишкадаҳои кишвар мебошанд.
Мусаллам аст, ки омӯзиши забони русӣ ва англисӣ, тарбия намудани кадрҳои омӯзгорӣ аз ин фанҳо, таълифи луғатҳои дузабона ва сезабона дар раванди омӯзиши забони русӣ ва англисӣ нақши муассире гузошта метавонанд. Дар ҳақиқат, феълан ҷумҳурӣ ба мутарҷимони варзидаи баландихтисоси дар сатҳи байналмилалӣ ҷавобгӯй ниёз дорад. Инро ба инобат гирифта, Ҳукумати ҷумҳурӣ тибқи барномаи махсус тайёр намудани тарҷумонҳои баландихтисоси ба талаботи давру замон ҷавобгӯйро ба нақша гирифтааст. Тибқи барномаи мазкур дар муддати шаш сол 180 нафар тарҷумони баландихтисоси забони русӣ ва 270 нафар мутарҷими забони англисӣ тайёр карда мешавад.
Баҳри рушди забон ва забономӯзии ҷавонон ва баланд бардоштани маҳорати касбии омӯзгорони ҷавон дастурҳои таълимӣ, раҳнамо ва нишондодҳои методӣ нақши бориз доранд. Инро ба инобат гирифта, дар барнома табъу нашри як зумра дастурҳои таълимӣ ба нақша гирифта шудааст. Муваффақона амалӣ гардидани Барномаи давлатии тайёр намудани тарҷумонҳои баландихтисоси ба талаботи давру замон ҷавобгӯй ҷиҳати ҳаллу фасли он камбудию норасоиҳое, ки дар мақола зикр гардидааст, мусоидат хоҳад намуд.
Ш. ЁРМУҲАММАДЗОДА,
директори Маркази ҷумҳуриявии таълимию методии назди Вазорати маориф ва илми Ҷумҳурии Тоҷикистон
Баёни ақида (0) Санаи нашр: 4.08.2016 №: 156 Мутолиа карданд: 5029
