маориф
НАХУСТИН МАКТАБИ ЗАМОНАВӢ
ДАР МАРКАЗИ НОҲИЯИ ШАМСИДДИНИ ШОҲИН
Имрӯзҳо дар маркази ноҳияи Шамсиддини Шоҳин сохтмони иншооти ҷашнӣ, аз ҷумла биноҳои ҳифзи иҷтимоӣ, шуъбаи амният, Амонатбонк, шуғли аҳолӣ ва меҳмонхона барои 50 ҷой, дар арафаи анҷомёбист. Ҳамчунин, дар ноҳия бунёди аввалин мактаби замонавӣ босуръат давом дорад.
Ғуломалӣ Бойев, сардори сохтмон, иброз дошт, ки бунёди мактаб бо саҳми Бонки рушди Арабистони Саудӣ моҳи ноябри соли гузашта оғоз ёфта, маблағи он 1 миллиону 540 ҳазор доллари ИМА-ро ташкил медиҳад. Дар он беш аз 180 коргари маҳаллӣ ба кор фаро гирифта шудаанд, ки аз 1000 то 1500 сомонӣ маош мегиранд. Мактаб аз се бинои сеошёна ва ду бинои дуошёна иборат буда, тибқи нақша дорои 22 синфхона, 44 ҳуҷраи ёрирасон, толори маҷлис, китобхона, қироатхона, ошхона ва толори варзишӣ хоҳад буд.
Зубайдулло Раҳмонзода, сармуҳаррири рӯзномаи ноҳиявии «Насими Терай», иброз дошт, ки ҳарчанд ноҳия соли 1931 таъсис ёфта бошад ҳам, тайи 30 сол дар маркази он мактаб набуд. Хонандагон ба мактабҳои деҳаҳои Девдору Саричашма мерафтанд. Баъдан, як бинои финиро барои 200 хонанда сохтанд.
Имрӯз сокинони маркази ноҳия шукргузоранд, ки ба шарофати истиқлолият соҳиби мактаби нави замонавӣ мегарданд.
Мунаввари САФАР, «Ҷумҳурият»
Баёни ақида (0) Санаи нашр: 12.08.2016 №: 162 Мутолиа карданд: 4894
