маориф
ММТ: БОЗ 10 ҲАЗОР ДОВТАЛАБИ ДИГАР ИМКОНИ ДОНИШҶӮ ШУДАН ДОРАД
Охиран натиҷаи озмуни тақсимоти асосии Маркази миллии тестии назди Президенти Ҷумҳурии Тоҷикистон муайян шуда, шумораи довталабони муваффақро 43 807 нафар эълон кард. Даҳ ҳазор довталаби дигар ҳам рӯзҳои наздик шонси муваффақ шудан доранд.
Сабзалӣ Ҷаъфаров, муовини аввали директори ММТ, мегӯяд, ки аз 59 260 довталаби ба озмуни тақсимот роҳёфта, 43 807 нафар пирӯз шуданд.
Ба андешаи ӯ, соли ҷорӣ ба таври умум 84 628 довталаб ба қайд гирифта шуд, ки нисбат ба соли гузашта 14,9 дарсад зиёд аст.
Ба гуфтаи Абулвосит Юлдошев, ёвари директори ММТ, «Соли ҷорӣ баъди эълони натиҷаҳо ба дастгоҳи асосии ММТ 13 аризаи апеллятсионӣ ворид шуд. Аризаҳои довталабони минтақавиро тавассути почтаҳои электронӣ қабул карда, далелҳои пешниҳодшударо таҳлилу баррасӣ намудем. Камбудиҳои содиркардаи довталабонро фаҳмондем. Ҳамеша мефаҳмонем, ки ҳатто рақамро дуруст нависед, компютер инсон нест, ки ҳар ҳарфи каҷро фаҳмад. Соли гузашта 94 адад аризаи апеллятсионӣ ворид шуда буд. Дар ин низом довталабро фиреб карда намешавад. Шаҳрвандон дер ё зуд инро қабул мекунанд. Довталаб баъди имтиҳон нусхаи масъалаҳои ҳалкардаашро бо худ ба хона мебарад. Баъди як рӯзи имтиҳонҳои супоридашуда шакли дурусти онҳо дар сомонаи ММТ нашр мешавад. Довталаб дафтари масъалаҳои имтиҳонро дар шоҳидии аҳли оила бо посухҳои дар сомонаи ММТ нашршуда муқоиса мекунад.
Масъулони ММТ аз сатҳи огоҳии довталабон ва низоми шаффофи имтиҳонҳо ёдовар шуда, мегӯянд, ки барои довталабони маъюб ва дар сафи артиш хидматкарда то 75 хол имтиёз муқаррар шудааст. Онҳое, ки дар даври аввал ба тақсимот роҳ ёфтаанд, бояд то рӯзи 15 август ба муассисаҳои таълимӣ ҳозир шаванд. Факултаҳои тиббӣ, ҳуқуқ, дипломатия ва иқтисод аз маъруфтарин ихтисосҳое унвон шуд, ки довталабони зиёд ба он таваҷҷуҳ кардаанд. Аз ҳама камтар таваҷҷуҳ ба факултаҳои техникӣ будааст. Тибқи имтиёзе, ки марказ барои довталабони дар артиш хизматкарда пешбинӣ карда буд, беш аз 500 нафар имтиҳон супорида, 329 кас ба марҳилаи тақсимот роҳ ёфт ва 199 нафар ятим ва 221 маъюб бо имтиёз ба муассисаҳои олии кишвар шомил шуданд. То ба ҳол 13 нафар довталаб бо норозигӣ аз натиҷаҳои имтиҳонот аризаи шикоятӣ пешниҳод кардаанд, ки нисбат ба соли гузашта камтар аст. 7 ҳолат мушаххас шуд, ки 1 холӣ ба назар гирифта нашудааст, зеро довталабон қоидаҳои пур кардани тестро дуруст риоя накардаанд ва ин боиси сар задани хатоҳо шудааст. Ҳоло имтиёз ё шонс барои зиёда аз 10 ҳазор довталаб боқӣ мондааст. Ба истиснои бахшҳои буҷетӣ, ки айни ҳол 98 дарсад пур шудааст. Дар бахши шартномавӣ бошад, ҳамагӣ 76 дарсад донишҷӯ роҳхат гирифтаанд. ММТ мегӯяд, ки айни ҳол ҳамагӣ 79 дарсади нақшаи қабули донишҷӯён иҷро шудаву марҳалаи дуюми тақсимот рӯзҳои 19 - ум то 22 август доир мегардад. Довталабони гузашта то рӯзи 15 - уми август ба муассисаҳои оливу касбӣ ҳуҷҷатҳояшонро пешниҳод накунанд, ҷойи онҳо ҳам холӣ эълон карда мешавад. Ба эҳтимоли зиёд аксари довталабони даври дуюми тақсимот ба бахши шартномавӣ қабул мешаванд. Дар ин бахш норасоии донишҷӯён бештар ба назар мерасад.
Ҳ. САНГОВА, «Ҷумҳурият»
Баёни ақида (0) Санаи нашр: 15.08.2016 №: 163 Мутолиа карданд: 5522
