маориф
МАКТАБИ ЗАМОНАВӢ ДАР ҲОИТ
Дар доираи сафари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияҳои водии Рашт як қатор иншооти хоҷагии халқ мавриди истифода қарор гирифтанд.
Аз ҷумла, дар Ҷамоати деҳоти Ҳоити ноҳияи Рашт мактаби хуштарҳу замонавӣ ба истифода дода шуд. Мактаби деҳа, ки ҳанӯз дар даврони шӯрави сохта шуда буд, куҳнаю фарсуда гашта, ба талаботи имрӯза ҷавоб намедод. Аз ин рӯ, тибқи дастуру супоришҳои Сарвари давлат моҳи августи соли 2015 сохтмони мактаби нав шурӯъ гардид. Фармоишгари он Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон буда, аз ҷониби Ҷамъияти дорои масъулияти маҳдуди “Мунис-С” ба маблағи 1 миллиону 926 ҳазор сомонӣ бунёд гардид.
Дар маросими ифтитоҳи мактаби наву замонавӣ вазири маориф ва илми ҷумҳурӣ Нуриддин Саидов ва намояндагони мақомоти иҷроияи маҳаллии ҳокимияти давлатии ноҳияи Рашт ширкат варзида, эъмори чунин муассисаи ба талаботи давру замон ҷавобгӯро аз сиёсати хирадмандона ва ғамхоронаи Сарвари давлат, Пешвои миллат муҳтарам Эмомалӣ Раҳмон нисбат ба соҳаи маориф арзёбӣ намуданд.
Мактаби дуошёна дорои 10 синфхона буда, барои 240 нафар хонанда пешбинӣ гардидааст. Мавриди истифода қарор гирифтани муассисаи наву замонавиро сокинони ин минтақаи дурдасти кишвар аз баракати сулҳу ваҳдат ва соҳибистиқлолии кишвар унвон карданд.
Дилшод АМИРОВ, «Ҷумҳурият»
Баёни ақида (0) Санаи нашр: 28.09.2016 №: 193 Мутолиа карданд: 6710
