мулоқотҳо
Вохӯрии
Эмомалӣ Раҳмон бо
Дмитрий Медведев
18 июл Президенти мамлакат Эмомалӣ Раҳмон дар ипподроми шаҳри Маскав дар мусобиқаи пойгаҳ барои гирифтани ҷоизаи Президенти Федератсияи Русия иштирок намуд.
Барои назорат аз ҷараёни ин мусобиқот ва доир намудани мулоқотҳои муҳими дуҷониба дар ин ҷо сарони 8 давлат ҳузур доштанд.
Зимни мулоқот бо Дмитрий Медведев Президенти Ҷумҳурии Тоҷикистон Эмомалӣ Раҳмон масоили вобаста ба омодагӣ ба сафари кории пешомади Президенти Федератсияи Русия ба Тоҷикистон ва сафари давлатии Президенти Ҷумҳурии Тоҷикистон ба Русияро, ки тирамоҳи соли равон ба вуқӯъ хоҳад пайваст, баррасӣ намуд.
Сардори давлати Тоҷикистон Эмомалӣ Раҳмон изҳори боварӣ намуд, ки зимни ин сафарҳо муносиботи дӯстӣ ва ҳамкории ду кишвар ба сатҳи боз ҳам баланд бардошта мешаванд ва пайомадҳои онҳо ба ҳаллу фасли мушкилоти ҷиддии минтақавӣ низ мусоидат мекунанд.
Сарони ду давлат умедвории зиёди худро аз мулоқоти чорҷонибаи сарони давлатҳои Тоҷикистону Русия ва Афғонистону Покистон, ки ба наздикӣ дар шаҳри Душанбе баргузор хоҳад гашт, таъкид намуданд.
Пурра ба истифода супурдани Нерӯгоҳи барқи обии «Сангтӯда-1», ки ба гуфти сарони ду давлат, аз бузургтарин лоиҳаҳои инвеститсионии бурунмарзии Русия аз замони пош хӯрдани Иттиҳоди Шӯравӣ аст, нишонаи оғози марҳилаи нави ҳамкории иқтисодию сармоягузории Тоҷикистону Русия маънидод гардид.
Дар мулоқот ҳамчунин атрофи авзои кунунии Афғонистону Покистон ва дигар масоили мавриди таваҷҷӯҳ гуфтугӯ сурат гирифт.
Бояд ёдовар шуд, ки Сардори давлат Эмомалӣ Раҳмон ин ва дигар масоили ҳамкории Тоҷикистону Русияро ҳамчунин 14 июл зимни сӯҳбати телефонии худ бо Дмитрий Медведев аз шаҳри Шарм-уш-Шайхи Ҷумҳурии Мисри Араб баррасӣ намуда буд.
Дар шаҳри Маскав Президенти мамлакат Эмомалӣ Раҳмон ҳамчунин бо намояндагони доимии вазорату идораҳо ва дигар мақомоти ҳокимияти давлатии Тоҷикистон, ки дар Федератсияи Русия ва созмонҳои минтақавии қаламрави собиқ Иттиҳоди Шӯравӣ фаъолият мекунанд, машварати корӣ доир намуд.
Дар машварат масоили вобаста ба иҷрои натиҷаҳои мулоқоти Президенти мамлакат бо тоҷикону ҳамватанони муқими Русия, ки чанде пеш дар шаҳри Екатеринбург сурат гирифта буд ва масъалаи пуштибонии шоиста аз манфиатҳои миллии Тоҷикистон дар ин кишвари паҳновар баррасӣ шуд.
Таъкид гардид, ки намояндагони ваколатдори Тоҷикистон аз мушкилоту эҳтиёҷоти шаҳрвандони давлати худ, ки дар Русия кору зиндагӣ мекунанд, бояд пайваста огоҳ бошанд ва баҳри ҳифзи ҳуқуқу манфиатҳои онҳо тадбирҳои саривақтӣ андешанд.
Сардори давлат Эмомалӣ Раҳмон ба онҳо оид ба иҷрои содиқона ва бо масъулияти вазифаҳои давлатию шаҳрвандиашон дастуру ҳидоятҳои мушаххас дод.
Баёни ақида (0) Санаи нашр: №: Мутолиа карданд: 1823
