маориф
КВОТА. ЧАРО ДОНИШҶӮЁН БА МАҲАЛҲО БАРНАМЕГАРДАНД?
Дар даврони Истиқлолияти давлатии Ҷумҳурии Тоҷикистон дар баробари дигар самтҳо соҳаи нигаҳдории тандурустӣ низ хеле рушд ёфтааст. Масъулони соҳа дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар хусуси баланд бардоштани сатҳи хизматрасонии тиббӣ ба аҳолӣ дар меҳвари фаъолият қарор дода, ба натиҷаҳои хуб ноил гашта истодаанд. Тибқи иттилои Рустам Шехзода, муовини раиси ноҳияи Ванҷ, ки сарпарастии соҳаро ба ҷо меорад, тайи солҳои охир бо маблағгузориҳои Ҳукумати кишвар, Вазорати тандурустӣ ва ҳифзи иҷтимоии аҳолӣ, мақомоти иҷроияи маҳаллии ҳокимиятҳои давлатии Вилояти Мухтори Кӯҳистони Бадахшон ва ноҳия дар марказ ва деҳаҳои Техарву Гармчашмаи деҳоти Техарв ва Рованд марказҳои саломатӣ, дар рустоҳои Гишхун, Баравн, Жамаг ва Лугад бунгоҳҳои тиббӣ бунёд гашта, беморхонаҳои маркази ноҳия ва касалхонаи минтақавии деҳаи Мотравни деҳоти Язгулом аз таъмири асосӣ бароварда шудаанд.
Дар яке аз сафарҳои кориашон ба ноҳияи Ванҷ Пешвои миллат ба беморхонаҳои маркази ноҳия ва деҳоти Язгулом мошинҳои ёрии таъҷилӣ тақдим намуданд. Инчунин, ба ин муассисаҳо таҷҳизоти нави ташхис ворид гардид. Лекин камбудии асосӣ он аст, ки дар беморхонаҳо ва марказҳои саломатӣ мутахассисони ҷавон, аз қабили духтурони қалб, чашм, пӯст, кӯдакон, мутахассисони таҷҳизоти ташхис намерасанд. Алҳол баҳри ба кор ҷалб кардани чунин табибон аз ҷониби мақомоти иҷроияи маҳаллии ҳокимияти давлатии ноҳия чораҷӯӣ карда мешавад. Ин масъала ба наздикӣ дар иҷлосияи Маҷлиси вакилони халқи ноҳия мавриди муҳокима қарор гирифт. Бовар дорем, ки дар ҳалли ин мушкилот, пеш аз ҳама, Вазорати тандурустӣ ва ҳифзи иҷтимоии аҳолӣ, донишгоҳҳои тиббии шаҳри Душанбе ва ноҳияи Данғара кумаки худро мерасонанд.
Ба гуфтаи муовини раиси ноҳия, ҳаминро илова карданӣ ҳастем, ки тайи солҳои истиқлолият аз ин ноҳия тибқи квотаи президентӣ 26 нафар хатмкунандаи муассисаҳои таҳсилоти миёнаи умумӣ ба Донишгоҳи давлатии тиббии ба номи Абуалӣ ибни Сино дохил шуда, онро хатм кардаанд, аммо ҳамагӣ як нафари онҳо - Шафоат Шарифова ба Ванҷ баргашта, ҳоло дар беморхонаи марказии ноҳия кор мекунаду халос. Саволе ба миён меояд, ки боқимонда 25 нафари дигар куҷо рафтаанд ва дар куҷо кор мекунанд? Пурсиши дигар ин аст, дар сурате ки дар асоси квотаи президентӣ мутахассисони ҷавони соҳаи тиб ба ноҳияҳояшон барнамегарданд онҳо аз ҷониби Донишгоҳи давлатии тиббии Тоҷикистон чӣ тавр ва бо кадом роҳ диплом гирифтаанд, ва ё бе чунин ҳуҷҷат дар муассисаҳои тиббӣ онҳоро чӣ гуна ба кор қабул мекарда бошанд?!
Сироншоҳи ДИЛОВАР, «Ҷумҳурият»
Баёни ақида (0) Санаи нашр: 01.11.2016 №: 217 Мутолиа карданд: 6111
