муҳоҷират
Интиқоли маблағи муҳоҷирон
29 миллион сомонӣ коҳиш ёфт
Дар соҳаҳои хоҷагии халқи шаҳри Ваҳдат 13506 нафар машғули кор буда, музди меҳнати онҳо ба 11150 ҳазор сомонӣ расид, ки нисбат ба ҳамин давраи соли гузашта қариб 3 миллион сомонӣ зиёд аст,-гуфт Қиёмиддин Абдуллоев, муовини аввали раиси шаҳри Ваҳдат, дар нишасти матбуотӣ.
Ҳисоби миёнаи музди меҳнат дар соҳаи саноат 322,5, сохтмон 210,3, нақлиёт 186,8, кишоварзӣ 75,1, тандурустӣ 109,1, маориф 193,2, хизматрасонӣ 212,7, бонкҳо 427,9 сомониро ташкил дод. Бо назардошти сектори хусусӣ ба маблағи 13383 ҳазор сомонӣ маҳсулоти саноатӣ истеҳсол шуд ва теъдоди корхонаҳои саноатӣ аз 25 ба 39 адад расид.
Назар ба ақидаи Қ. Абдуллоев, асоси иқтисодиёти шаҳри Ваҳдатро сектори аграрӣ ташкил медиҳад. Хоҷагиҳои кишоварзӣ ва деҳқонии инфиродӣ ба мушкилоти обу ҳаво ва бӯҳрони молиявӣ нигоҳ накарда, дар майдони 14490 гектар кишти тирмоҳӣ ва баҳорӣ гузарониданд. Ноҳия дорои 1598 га майдони боғ, 1426 га токзор ва 285 га тутзор аст.
Мавсуф зикр кард, ки агар солҳои қаблӣ деҳқонон аз сардию гармӣ ва хушксолӣ зиёни молиявӣ кашида бошанд, имсол онҳоро боронҳои пай дар пай ва жолаҳо ба ташвиш оварданд. Офати табиат ба маблағи 6200 ҳазор сомонӣ зиёни иқтисодӣ ворид сохт.
Қ. Абдуллоев ба саволҳои хабарнигорон посух дода, аз ҷумла гуфт, ки шумораи муҳоҷирони меҳнатӣ то 1 июли соли равон 11489 нафарро дар бар мегирад. Интиқоли маблағҳои пулӣ аз тарафи онҳо дар нимсолаи аввали соли ҷорӣ ба 119283 ҳазор сомонӣ расид, ки назар ба ҳамин давраи соли гузашта 29 миллион сомонӣ кам аст. Маблағҳои интиқолдода ба ҳар як нафар сокини шаҳр 444 сомонӣ рост меояд.
М. САФАР
Баёни ақида (0) Санаи нашр: №: Мутолиа карданд: 3839
