Бино бар иттилои Шамсулло Сатторов, мудири шуъбаи маорифи ноҳияи Темурмалик барои бунёди таълимгоҳҳои наву замонавӣ, синфхонаи иловагӣ, таъмини мактабҳо бо асбобу ашёи хониш ва ҳавасмандии омӯзгорон як қатор корҳо анҷом дода шудаанд. Бахшида ба 25 - солагии Истиқлолияти давлатии Ҷумҳурии Тоҷикистон 2 - муассисаи таҳсилоти миёнаи умумӣ, 18 - синфхонаи иловагӣ барои 432 хонанда сохта ба истифода дода шуд. 

Умуман, дар зарфи 25 соли истиқлолият дар ноҳия 19 муассисаи нави таълимӣ ва 28 синфхонаи иловагӣ бо фарогирии 3714 ҷойи сохта шудааст. Дар доираи Барномаи давлатии рушди соҳаи маориф ва илми Ҷумҳурии Тоҷикистон барои солҳои 2017 – 2021 сохтмони боз 26 муассисаи таълимии нав ва 7 муассисаи томактабӣ ба нақша гирифта шудааст.  

«Имсол муассисаҳои таълимии ноҳияро 987 нафар хонанда хатм карда, 799 нафари онҳо ба Маркази миллии тестӣ ҳуҷҷат супорида, 444 нафари онҳо сазовори номи донишҷӯ гаштанд. Ҳамзамон, 27 нафар (14 писар ва 13 духтар) сазовори квотаи президентӣ дониста шуданд. Дар 5 соли охир 72 нафар ҷавонписарону духтарон ба донишгоҳҳои давлатҳои хориҷӣ дохил гашта, бо ихтисосҳои гуногун таҳсил карда истодаанд, ки ин падида барои муҳассилини ноҳия таҷрибаи нав маҳсуб меёбад», - иброз дошт  Ш. Сатторов.