маориф
МАКТАБИ НАВИ ЗАМОНАВӢ ДАР ТОҶИКОБОД
Рушди соҳаи маориф яке аз ҳадафҳои афзалиятноки Ҳукумати ҷумҳурӣ буда, бунёди муассисаҳои нави таълимӣ дар гӯшаҳои дурдасти кӯҳистони кишвар ба ин ҳадафҳо созгор мебошад.
Солҳои зиёд хонандагони мактаби деҳаи дурдасти Лангари Шоҳи ноҳияи Тоҷикобод аз нарасидани ҷои нишаст танқисӣ мекашиданд. Хушбахтона, бо дастгирии Ҳукумати ҷумҳурӣ ва бо ҷалби сармоягузории Созмони ҳамкориҳои Олмон хонандагони мактаб соҳиби бинои наву замонавӣ гардиданд. Барои сохтмони муассисаи нави таълимӣ 1 миллиону 888 ҳазор сомонӣ сарф гардид.
Муассисаи таълимӣ дуошёна буда, барои 290 нафар хонанда дар як баст пешбинӣ гардидааст.
Тавре дар суҳбат сарвари муассисаи таҳсилоти миёнаи умумии №17-и деҳаи Лангари Шоҳ Сироҷиддин Нуров иброз намуд, хонандагони ин муассисаи таълимӣ солҳои зиёд аз нарасидани ҷои нишаст мушкилӣ доштанд ва, хушбахтона, баробари мавриди баҳрабардорӣ қарор гирифтани мактаби нав мушкилии онҳо бартараф шуд. Қобили зикр аст, ки хонандагон баробари соҳиби бинои нав шудан, инчунин бо таҷҳизоти зарурӣ таъмин гардиданд.
Бунёди муассисаҳои таълимӣ дар гӯшаҳои дурдасти кӯҳистони кишвар имкон медиҳад, ки хонандагон дар биноҳои наву замонавӣ бо шароитҳои мусоид ба таълиму тадрис фаро гирифта шаванд.
Дар чорабинӣ омӯзгорон ва сокинони деҳа аз дастгириҳои ҳамешагии Ҳукумати ҷумҳурӣ изҳори миннатдорӣ намуда, бунёди муассисаи ҳозиразамонро туҳфаи Ҳукумати ҷумҳурӣ ба насли наврас арзёбӣ намуданд, ки он аз баракати сулҳу ваҳдат ва соҳибистиқлолии кишвар башорат медиҳад.
Дилшод АМИРОВ, «Ҷумҳурият»
Баёни ақида (0) Санаи нашр: 6.12.2016 №: 239 Мутолиа карданд: 7183
