ҳуқуқ
47,9 МИЛЛИОН СОМОНӢ ЗАРАРИ МОЛИЯВИЕ, КИ ДАР СУҒД ОШКОР ГАШТ
Давоми даҳ моҳи соли равон дар миқёси вилояти Суғд 646 ҷинояти коррупсионӣ ва иқтисодии хусусияти коррупсионидошта ошкор шудааст, ки 47,9 миллион сомонӣ зарари молиявӣ дар пай дорад.
Дар ин бора зимни ҷаласаи Шӯрои ҳамоҳангсозии фаъолияти мақомоти ҳифзи ҳуқуқ оид ба иҷрои нақшаи чорабиниҳои татбиқи «Стратегияи муқовимат бо коррупсия дар Ҷумҳурии Тоҷикистон барои солҳои 2013 - 2020» иттиллоъ дода шуд. Дар ҷаласа ҳолати иҷрои қонунгузорӣ перомуни мубориза алайҳи коррупсия ва пешгирии ҳуқуқвайронкуниҳои коррупсионӣ дар фаъолияти кормандони мақомоти иҷроияи маҳаллии ҳокимияти давлатии шаҳру ноҳияҳои вилоят, ҳифзи ҳуқуқ ва дигар муассисаҳои давлатӣ баррасӣ гардид.
Дар ҷаласа оид ба ҷилавгирӣ аз амалҳои коррупсионии дохилиидоравӣ, аз байн бурдани омилҳои ба он мусоидаткунанда байни кормандони мақомоти ҳифзи ҳуқуқ, мақомоти иҷроияи маҳаллии ҳокимияти давлатии шаҳру ноҳияҳо, худидоракунии шаҳраку деҳот, кумитаҳои идораи замин, муассисаҳои маорифу тандурустӣ, бонкҳо ва дигар муассисаҳо таваҷҷуҳи хос зоҳир гардид. Дар ҳамин ҳол, раванди ошкорсозӣ, оғоз ва тафтиши парвандаҳои ҷиноятӣ, парвандаҳои маъмурии коррупсионӣ мавриди таҳлил қарор дода шуд.
Дар идомаи ҷаласа зикр шуд, ки дар ин давра аз ҷониби Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд 208 парвандаи ҳуқуқвайронкунии маъмурӣ, ки ба омилҳои коррупсионӣ мансуб аст, мавриди баррасӣ қарор дода шудааст.
Ба хотири тақвият бахшидан ба фаъолияти субъектҳои зидди коррупсия муборизабаранда, баланд бардоштани сатҳи маърифати ҳуқуқии шаҳрвандон ва паёмадҳои номатлуби амалҳои коррупсионӣ дар ҷаласа қарорҳои дахлдор қабул гардид. Зимнан, таъкид шуд, ки прокуратураи вилояти Суғд дар якҷоягӣ бо дигар мақомоти ҳифзи ҳуқуқи вилоят мубориза алайҳи ин падидаи номатлубро таҳким бахшида, шахсони ба амалҳои коррупсионӣ дастдоштаро тибқи қонун ба ҷавобгарӣ хоҳанд кашид.
Ҷовиди АШТӢ, «Ҷумҳурият»
Баёни ақида (0) Санаи нашр: 12.12.2016 №: 243 Мутолиа карданд: 4448
