маориф
КОЛЛЕҶИ ТИББӢ. ТАЪМИНОТ БО КАДРҲОИ СОҲАИ ТАНДУРУСТӢ БЕҲТАР МЕШАВАД
Пас аз ба даст овардани соҳибистиқлолӣ ноҳияи Рашт ободу зебо гардида, дар ин давра як қатор иншооти муҳими хоҷагии халқ мавриди истифода қарор гирифтанд.
Донишҷӯёни коллеҷи тиббии ноҳия соҳиби бинои наву замонавӣ гаштанд. Бинои нав сеошёна буда, дорои китобхона, қироатхона, ошхона, маҷлисгоҳ, синфхонаҳои компютерӣ, фаннӣ ва лабораторияи химиявӣ мебошад.
Ба иттилои муовини директори коллеҷ Маҳмадсиддиқ Зиёев, тамоми синфхонаҳо бо таҷҳизоти гармидиҳанда таъмин мебошанд. Айни замон дар муассиса 825 донишҷӯ ба таҳсил фаро гирифта шудааст, ки аз ин 342 нафарашро духтарон ва 483 нафарашро ҷавонписарон ташкил медиҳанд.
Дар назди коллеҷ барои 124 нафар хобгоҳ фаъолият намуда, бо тамоми шароитҳои зарурӣ муҳайё мебошад. Тибқи иттилои масъулон, аз сабаби сарду тӯлонӣ будани зимистони ин ноҳияи кӯҳистон барои зимистонгузаронӣ 11 тонна ангишт ва 10 метри мукааб ҳезум захира карда шудааст, ки барои пушти сар намудани фасли сармо басанда аст.
Яке аз мушкилоти асосӣ дар навоҳии кӯҳистон, ин норасоии кадрҳо дар бунгоҳҳои тиббӣ ва марказҳои саломатӣ мебошад. Аз ин рӯ, фаъолияти коллеҷи тиббӣ дар ноҳияи Рашт барои тайёр кардани мутахассисони соҳаи тиб ва таъмини беморхонаҳои деҳот бо кадрҳои маҳаллӣ мусоидат хоҳад кард.
Дилшод АМИРОВ, «Ҷумҳурият»
Баёни ақида (0) Санаи нашр: 14.12.2016 №: 245 Мутолиа карданд: 6548
