ҳуқуқ
ЗИЁДАРАВӢ. ҚОНУН НАМЕБАХШАД
Ҳадафи асосии Қонуни Ҷумҳурии Тоҷикистон «Дар бораи танзими анъана ва ҷашну маросимҳо» пеш аз ҳама ба танзим даровардани расму оин ва ҷашну маросимҳои миллӣ дар шароити ҷаҳони муосир мебошад. Бояд қайд кард, ки давлати мо яке аз аввалинҳо шуда, чунин санади муҳимро қабул намуд.
Бо гузашти зиёда аз нуҳ сол таҷриба нишон дод, ки татбиқи қонуни мазкур дар баланд бардоштани сатҳи зиндагиву рӯзгори мардум ва беҳтар гардидани маърифати шаҳрвандон заминаи мусоид фароҳам овард. Равшан аст, ки то қабули ин қонун сокинони кишвар дар шаҳру навоҳии мамлакат маърака, расму оинҳои миллиро бо харҷи зиёд баргузор намуда, солҳои зиёд аз шахсони алоҳидаву бонкҳои гуногун қарздор мешуданд. Аз таҳлилҳо бармеояд, ки яке аз сабабҳои хонавайрон гардидани оилаҳои ҷавон низ ба ин масъалаҳо вобастагӣ доранд. Пас аз бодабдаба гузарондани базми хонадоршавӣ муаммои қарз ва роҳи сардаргуми падару модар боиси ба вуҷуд омадани хархашаву нофаҳмиҳои навхонадорон мешавад. Замоне ки қонун мавриди амал қарор гирифт, баргузории маросимҳое ба монанди духтарталабон, домодталабон, ҳоҷибинон, хатнатӯй, бист, сӣ, чиллагурезон маҳдуд гардиданд.
Баргузории маросими ақди никоҳи навхонадорон низ ба танзим даромадааст. Айни ҳол барои гузарондани базми арӯсӣ ҳамагӣ чор мошин пешбинӣ шудааст. Кормандони Раёсати Бозрасии давлатии автомобилии Вазорати корҳои дохилии Ҷумҳурии Тоҷикистон барои татбиқи қонуни номбурда ҳамарӯза, бавижа рӯзҳои истироҳат дар кӯчаву хиёбонҳои шаҳру навоҳии кишвар чорабиниҳои мақсаднокро доир менамоянд. Мутаассифона, таҳлилҳо нишон медиҳанд, ки ҳанӯз ҳастанд нафароне, ки қонуни танзимро нодида мегиранд. То имрӯз аз тарафи кормандони БДА зиёда аз 5400 ҳолати ҳаракати гурӯҳи мошинҳои аз муқаррарот бештар ба қайд гирифта шуда, барои чораандешӣ парвандаҳо ба суд ирсол карда шудааст. Дар давоми бештар аз як моҳ, яъне аз 26 октябр то 20 ноябри соли ҷорӣ 643 ҳолати аз меъёри муқарраргардида зиёд истифода бурдани воситаҳои нақлиёт дар базми арӯсӣ аз тарафи кормандони БДА ошкор карда шудааст.
Аз автомобилҳои ба базм омодашуда нидову фарёдҳои ҷавонон ва бонги гӯшхароши силсиладор садо дода, мардуми атрофро сахт нороҳат мекунанд. Ҳатто ҳолатҳое ошкор гардид, ки арӯсу домод худашон ба сари чанбарак менишинанд ва ба қавле “ба сафари ошиқона” мебароянд, ёру дӯстони мошинсавори онҳо аз пешу қафо тадриҷан ҷамъ омада, дар назди биноҳои ақди никоҳ ҳолатҳои тамбашавӣ ва қоидавайронкуниро ба амал меоваранд. Барои ин амалҳои хилофи қонун аксар маврид падару модарон ва пирони корозмуда низ гунаҳкоранд. Зеро маҳз онҳо метавонанд, худнамоӣ ва дабдабаи нолозими ҷашну маросимҳоро пешгирӣ намоянд ва фарзандонашонро аз зиёдаравӣ эмин доранд. Ҳамзамон, маблағеро, ки аз маросимҳои гуногун сарфа мешавад, барои беҳбудии рӯзгори оянда ва таълиму тарбияи фарзандонашон истифода баранд.
Аҳмадулло НАРЗИҚУЛОВ,
маркази матбуоти раёсати БДА ВКД, Бузургмеҳри БАҲОДУР, “Ҷумҳурият”
Баёни ақида (0) Санаи нашр: 16.12.2016 №: 247 Мутолиа карданд: 4433